前一段辰光朋友圈被一张照片刷屏：一个礼拜里，温度从21摄氏度、25摄氏度、27摄氏度、30摄氏度，一记头蹿到39摄氏度。后来气象台马上出面辟谣，讲是某些手机软件个“大数据系统”出错了，其实只有28摄氏度。

　　勿过，搿种“高烧”日脚说来就来，一记头就热起来也勿是勿可能。喏，中浪向，太阳下头走辣马路浪已经晒得有点头昏了。

　　弯进超市8块洋钿买根雪糕。辣末生头想起小辰光，爷娘下班回来，用一只胖笃笃矮墩墩个竹壳热水瓶装回来个冷饮水，有辰光是盐汽水，有辰光是酸梅汤。

　　从泡进热水瓶到拎到屋里向，起码也有个把钟头了，吃到嘴巴里冷饮水会觉着已经稍许有一点点温吞了。勿过，一碗酸梅汤，甜咪咪酸叽叽，是大热天里阿拉小朋友伸长仔头颈盼好仔个好物事，而且，还是覅花铜钿嗰。

　　后来再晓得，酸梅汤几乎是阿拉国家个国民饮料了。北京有信远斋个酸梅汤，交关老吃客侪对伊念念勿忘：冰糖多、梅汁稠，味浓而酽，甜酸适度，吃一口冰冰凉凉……至于阿拉上海，也有郑福斋个桂花酸梅汤。老底子，大世界旁边个郑福斋门前总有勿少人立辣海，花一角洋钿吃一碗又甜又酸、带桂花香气个酸梅汤，搿也是从前上海滩热天里个一道风景线。

　　后来免费个冷饮水呒没了，再后来大家侪吃可乐搭仔雪碧了，再后来，又重新有瓶装酸梅汤卖了。真是风水轮流转。

　　其实，酸梅汤自家做做也便当煞嗰。到中药房去买点乌梅、甘草、陈皮、山楂，考究点嗰，也可以再加点桑葚、洛神花、薄荷叶、桂花老啥，先摆适量水，浸泡一两个钟头以后，用大火烧开，小火笃一个钟头，最后摆冰糖，笃到冰糖烊脱。等冷透以后，拿汤水滗出来，摆辣冰箱里冰一冰。

　　从大太阳下头回到屋里，吃一口冰镇酸梅汤，味道勿要忒好，感觉一记头就清凉下来了。