老早子，骆驼祥子辣老北京拉人力车个辰光，上海滩也有搿种车子，不过名称叫“黄包车”。为啥叫“黄包车”呢？因为车主为了让车子更加醒目，方便招徕生意，辣车子浪涂刷黄漆。另外就是上海人讲腔调，突出“包车”两字。当时有铜钿人家自备车辆搭仔车夫，打扮得明光锃亮。比黄包车高级一点嗰是三轮车。三轮车车夫勿需步行，只要用力踩踏。速度快，省力气。上下桥，车夫往往立辣车子浪向用力蹬，像跑步机。假使坡度实在太陡，车夫就下车一步一步拉，蛮吃力嗰。

　　除脱黄包车、三轮车，当时辣马路浪向跑来跑去嗰，还有独轮车、劳动车（人力板车）、老虎榻车（大型人力板车）以及三轮车个兄弟——黄鱼车。黄鱼车个结构原理，同三轮车差勿多，只是远远呒没三轮车考究。因为三轮车要载人，需要讲派头，黄鱼车只是运货，好用就好。为了要尽可能多装货，黄鱼车就尽量简化结构，最后就只有铁框加轮子加传动链条。伊个特点是车身轻、能吃重、成本低、使用灵活。据说埃息辰光十六铺鱼市场里卖黄鱼个鱼贩侪用搿种车子，所以大家叫伊“黄鱼车”。

　　几十年过去了，黄包车、三轮车、劳动车、老虎榻车……已经勿见踪影，独独当时不上台面个黄鱼车，现在还能经常辣马路浪看到。早浪向卖大饼油条嗰，白天卖杂货嗰，夜里卖烤串、麻辣烫嗰，尤其是菜贩，侪欢喜用黄鱼车。

　　我朋友老良是一个菜贩，当初伊刚刚开始做搿门生意个辰光就买了一辆黄鱼车。当时交关摊贩只晓得摆地摊，老良辣黄鱼车浪搁块木板就能做生意，木板下面放货物。勿管是出摊，还是去批发市场进货，侪邪气方便。

　　老良黄鱼车浪向个菜品随季节变化，有辰光是毛豆、豌豆，有辰光是韭黄、豆苗，有辰光是芦笋、竹笋等等，不变个“当家花旦”是青菜。我最欢喜个是浦东小塘菜。小塘菜个“塘”古代指“堤”，所谓河塘就是河堤。乡下开河，或者疏浚河浜，烂污泥堆辣河浜两边，成为河堤。辣堤坡浪向种菜斜气适宜。小塘菜是优良品种，据说最早出辣花木地区龙王庙一带。老良黄鱼车浪向个小塘菜呒没浸过水，既不翠绿得张扬，也勿是恹恹个无精打采，是一种正常过日脚个气色。吃口好，酥而糯。大冷天，小塘菜煮冻豆腐，热乎乎，美到心里去。