上海闲话里个“猪头三”最初是一个用来骂人个歇后语，是“猪头三牲”歇后“牲”字，骂人是牲畜。新中国成立以后，上海普及义务教育，市民素质提高了，社会浪当面寻相骂个人少了，“猪头三”个用法也发生了变化，逐渐被用来指呒没头脑，做事体勿灵光个人。再后来，熟人之间互相调侃，有时也会用“猪头三”来贬低对方，搿就只是一种朋友之间个寻开心了。

　　今年春暖花开个辰光，我到浙江淳安个千岛湖旅游，听到了一个勿一样个“猪头三”。当时阿拉迭个旅游团一道乘车去淳安县金峰乡朱家村，导游是一个姓胡个小姑娘。伊讲朱家村勿但有古桥、古道搭仔古村，还有一个传统风俗叫“猪头三”。车子浪几个上海来个老人听了侪哈哈笑，阿拉上海人啥人勿晓得“猪头三”，还要侬搿个淳安姑娘来讲啊！结果听到后来才晓得，伊讲个勿是“猪头三”，而是“猪头赛”。

　　据说朱家村个始祖是南宋理学家朱熹第四代子孙朱澹，朱氏子孙每逢过年会用猪头祭祀祖先，搿个习俗已经辣当地传承了八百多年。每年农历正月初六，老清老早三点钟，村里就会响起锣鼓声。各家各户拿精心打扮个猪头放辣竹篮头里，集中到张灯结彩个朱家祠堂，摆放辣朱氏祖宗画像前。祭祖之后，“猪头赛”就开始了，村里有威望个老人会拿杆秤对猪头进行称重、评比，看看啥人家个猪头分量重，啥人家个猪头装饰漂亮，选出最好个发红包、发年画。因为活动邪气闹猛，交关游客和摄影爱好者侪会专门挑迭个辰光来白相、拍照。

　　听导游小胡姑娘讲得扎劲，旅游团里好几个人侪讲，明年过年要再来朱家村旅游，轧轧闹猛，看看“猪头赛”。还有人打棚讲笑话，对另外一个人讲：“侬搿个猪头三肯定要去看猪头赛嗰！”引得车厢里个人侪哈哈大笑。