“扇子扇凉风，扇夏不扇冬，有人问我借，过了八月中。”搿是一只家喻户晓的儿歌，有年头了。而现在，也真是看勿大见迭种蒲扇了，就是用蒲葵树叶子割成一个圆圈做出来的扇子。

　　摆辣老底子，几乎家家人家侪人手一把。常常是天还勿大热的辰光，杂货店里就开始堆辣海卖了，大大小小，有种粗糙一眼，买回去后，姆妈会用布条辣沿口包一圈边。

　　一来是经用，二来也是嫌比伊毛拉拉，容易拉手；有种精致一眼，我小辰光就有一把，应该是选比较嫩的叶子，又用琉璜熏成嫩嫩的奶油颜色，扇子沿口搭仔柄，用同样是奶油颜色的塑料带子绕了包好，捏上去煞光滴滑（非常光滑），所以，我一直叫伊奶油扇子。

　　大热天里向，吃好夜饭，汏好浴，搬把竹头躺椅，人清清爽爽躺辣梧桐树下头，扇子摇摇，夜空里侪是痱子粉搭仔花露水的味道。搿种辰光，扇子当然是勿肯脱手呃，借拨人家，自家日脚覅过啦。

　　据说，蒲扇辣阿拉中国，已经有1500多年历史了。据说东晋名士谢安，就是当年淝水之战的总指挥，伊曾经帮一个卖蒲扇的同乡代言。拿把扇子辣手里，假痴假呆（装模作样）摇法摇法。结果，风流名士一时头里侪学伊个样子，人手一把蒲扇。同乡5万把蒲扇，一记头卖空。

　　就算摆辣现在，一把蒲扇也就三、五块洋钿，材料取自树叶，手工制作，造型古朴，简单好用，邪气环保，真勿晓得阿会得有一天，市面浪再起一只蓬头，马路浪人手一把蒲扇，摇啊摇。