“做人要识相，勿识相请侬吃辣火酱”。搿是小辰光，大人对调皮捣蛋个“小把戏”发出个警告，效果还是蛮好嗰。过街楼苏北爷叔个儿子，读书成绩辣班级里排倒数第一第二名。后来老师家访告状，苏北爷叔晓得儿子辣学堂里搿副“吞头势”，顿时严加管教，作业勿做好绝对勿许出去白相。伊每天个口头禅就是“勿识相请侬吃辣火酱”。

　　苏北爷叔勿是随便讲讲嗰，光起火来，“小把戏”吓得“刮刮抖”，从此变得识相了。弄堂里个邻居侪晓得，“小把戏”白相心思邪气重，但小聪明也是有嗰。一年以后，“小把戏”读书成绩突飞猛进，班级排名前十。中考考进区重点，高考考进“二本”。收到大学录取通知书，苏北爷叔开心煞了，到处发喜糖。辣屋里，从前弄堂发到后弄堂；辣单位，从车间发到食堂。每当大家夸小人聪明，苏北爷叔就自夸教育有方，讲全靠搿句口头禅：“勿识相请侬吃辣火酱”。

　　识相勿识相，用上海话解释，就是要会“看山势”，用普通话讲，就是要知趣。可惜个是，有一部分人就是勿会识相，教也教不会。朋友阿俊前几年因为拆迁，搬到郊区，上下班不方便，就买了一辆汽车。第一天开车上班，同事侪去车库“参观”，称赞车子漂亮。隔壁办公室个小美女来“轧闹猛”，跟阿俊开口：“阿拉同路，以后上下班就搭侬车啦！”大家当伊开玩笑，呒没相到当天下班，伊就候辣阿俊办公室门口。两人几乎同进同出，也因此传出了“花边新闻”。

　　搿桩事体让阿俊邪气头痛，侪是有家有室个人，每天同进同出算啥名堂？万一被太太晓得，跳进黄浦江也讲勿清爽，但想要直接拒绝又开不出口。小美女呢，真是勿识相，车子搭就搭了，从来勿讲一句谢谢，好像让伊搭车就是理所应当嗰，每天大大咧咧坐辣后排。有同事看勿惯，私下跟阿俊咬耳朵：“搭车要识相，坐后排好像掼领导派头嘛！”

　　最让阿俊勿适意个是，小美女经常坐辣后排哇啦哇啦打电话。一歇歇打给闺蜜，讲上个礼拜辣港汇买了两只黛安芬，买一送一。一歇歇又打给老公，问老公：“今朝啥日脚侬还记得口伐？”老公辣电话里猜了半天猜勿出。伊就发嗲：“侬忘记脱啦？今朝是阿拉第一次约会个纪念日呀！当天辣静安公园见面，后来又去吃了九井个日料。一大盘刺身，侬还帮我拍了好几张照口来。”

　　阿俊叹苦经：“介私密个闲话当着我个面讲，真当我是开网约车个司机啦！”阿拉就跟阿俊出主意，以后下班就讲：“不好意思，今朝夜里要出去应酬，呒没办法顺路了。”几次一来，伊就识相了。

　　还有一种勿识相，叫“只看衣装勿看人”。朋友阿炎是一家文化创意公司老板，有一天心血来潮，跑到屋里附近个一家奥迪4S店，想买一辆Q7，淘汰开了好几年个老奥迪。因为是休息天，又离屋里不远，所以穿了一套居家休闲装。呒没想到进店以后，销售员呒没一个上来接待，拿伊晾辣边浪向。气得阿炎“调枪头”，跑到斜对面个店里买奔驰去了。

　　隔天奥迪店个经理晓得搿桩事体以后邪气光火，辣店面个晨会浪向训话：“侪讲做生意要有眼光，但是以衣帽取人是勿可以嗰。侬以为西装革履就一定有‘立升’啊？不一定！大热天穿得西装笔挺，也勿怕捂出痱子口来！现在往往有钞票嗰穿布鞋，呒没钞票嗰穿皮鞋；有钞票嗰吃野菜，呒没钞票嗰吃荤菜；有钞票嗰辣屋里踏动感单车，呒没钞票嗰辣马路浪骑共享单车。以后，侪要眼乌子睁睁大，要学会‘看山势’，客人就是衣食父母，客人上门就要热情接待。哪怕今朝勿买车子，不等于以后不买，搿叫潜在客户。勿要勿识相，啥人勿识相，请伊吃辣火酱！”