小辰光住辣天潼路，读书辣拉河南北路小学。学堂呒没操场，体育课只能掼掼实心球、跳跳高、打打乒乓球，不过有一项特色项目——爬竹竿。竹竿辣拉一个像庙一样的大殿里，搿些竹竿一根根侪有碗口粗，从地浪一直可以爬到大殿顶浪，有三四层楼高。

　　除脱爬竹竿，阿拉每年冬天还要“长征”。每天早浪头，老师带辣阿拉辣拉弄堂里跑步，跑了几天，就会得辣拉教室墙壁浪个地图高头插红旗。“同学们，阿拉今早到瑞金了！”“同学们，阿拉到井冈山啦！”根据距离折算，阿拉就辣拉弄堂里从上海出发，象征性跑到了革命圣地延安，再跑回上海。好像因为有了目标，跑起来就勿吃力了。

　　后来阿拉从大人搿搭晓得，阿拉小学以前是一座妈祖庙，也叫天妃宫。庙里头个菩萨可能“文革”辰光清理出去了，供菩萨个台子就变成了阿拉个舞台。我还辣拉上头跳过集体舞，朗诵过诗歌呢。

　　学堂附近是苏州河，河浪头有一座河南北路桥，阿拉热天经常辣拉桥边浪做好事。伊个辰光有交关踏三轮车个老师傅，伊拉上桥踏了老吃力，阿拉几个小八腊子就辣拉三轮车后头帮忙推，还帮老师傅们送茶水。“谢谢，小朋友！”老师傅们个感谢，让阿拉觉着蛮自豪。

　　到了热天夜快辰光，河南北路桥高头经常有人白相跳水。打了赤膊个男人们，一个个跳进黑漆漆、臭烘烘、油花花个苏州河，现在想想伊拉勿晓得难能吃得消。

　　河南北路桥个对面是黄浦区，阿拉属于闸北区，河南北路个对面是虹口区。勿晓得为啥道理，黄浦区、虹口区个亲戚侪比阿拉骄傲，觉着伊拉住个地段比阿拉高级。姆妈讲，可能因为闸北区解放前是华界，呒没虹口区、黄浦区个租界繁荣。不过我觉着隔条马路、隔条河浜，呒没啥差别啊？

　　小学上了一半，学堂拆脱了，听说外地有个地方要拿阿拉学堂个庙堂整体搬去，重新做一个庙，阿拉后来就转学了。

　　三十几年过去了，现在苏州河清澈了，河南北路变了模样，只有童年个记忆依然清新。