跑到上海滩来，大家基本上是听勿到一个“不”字个。上海闲话里向呒没“不”字。上海人勿讲“不”字。上海人只讲“勿”。北方人要否定、要拒绝、要反对，一个“不”字解决问题。北方人个性格、脾气爽爽快快，是山里人扛毛竹，直来直去。上海人就软熟多了，以“勿”来应对局面。而且上海人单单只讲一个“勿”字个辰光是老少个。上海人讲出一连串个“勿”字是来表示回头人家。弄堂里向常常可以看到有客人上门来送礼、有主人家回礼送客，两个人拿大小礼品、礼盒推过来推过去，两个人表示出相当个客气，都是口吐一长串个“勿、勿、勿，勿、勿、勿……”语气抑扬顿挫，老老好白相个。搿个就是上海人个有趣。还有只讲一个“勿”字个场合，多半是大人训小囡，小囡勿领盆，强头倔脑只应一个“勿”字。“大热天勿许野出去！”“勿！”“放夜学早点死回来！”“勿！”一个“勿”字表达反抗、表示勿服帖、表示勿卖账。单表一个“勿”字，小儿用语。人长大了，就讲有两个“勿”、三个“勿”个闲话了。人熟了，就讲软熟闲话哉，就讲平常生活中个熟语哉。

　　两个“勿”字个上海闲话太多太多。勿对、勿错、勿是、勿要、勿止、勿及、勿许、勿论、勿必、勿曾、勿定、勿如、勿比、勿过、勿妨、勿怪、勿消、勿惯、勿算……假使拿高低、大小、长短、快慢、冷熟、明暗之类个闲话搭配上去，就多得勿得了了。“勿局”是其中老一点或者是相当老个上海人讲得来、听得懂个老上海闲话。勿局，不行，勿来三。我个模糊考证是认为勿局出自于老苏州，是苏州闲话。听苏州评弹个辰光，常常可以听到勿局。勿局还有大事勿好了个意思勒里向。请问小苏州、老苏州，阿对勒勿对？

　　三个字里有勿字个上海闲话也交交关关。上海人最习惯讲个有勿得了、勿搭界、勿算数、勿碍事、勿作兴、勿舍得、勿单单、勿着落……上海小姑娘发嗲：“勿睬侬！”上海人吵相骂：“勿识相！”上海人有怀疑：“勿见得！”上海人表示勿快：“勿适意！”内中“勿然介”大概是新上海人、小上海人听大勿懂个闲话。勿然介，不然的话，是上海闲话里个关联用语。四个字里有勿字个上海闲话里最出名个是有点骂人个，是勿二勿三、勿三勿四了。意思是不正派、不正经、不规矩、不规范。勿×勿×是可以填充个上海闲话。勿上勿落、勿大勿小、勿死勿活、勿尴勿尬、勿快勿慢、勿近勿远、勿硬勿软……可以总结出一条，上海人讲出“勿”字个闲话是勿勿少少。基本上都弄明白了，上海闲话托福可以考上四、六级了。