现在，无论到商店、超市还是菜场，侪是用塑料袋装物事。老早仔侪是用纸头包装物事个。勒拉上世纪五六十年代，侬到一些小杂货店买瓜子糖果之类，商店侪是用旧书报杂志纸头包成一种三角形个包，阿拉侪叫伊“三角包”。一些卖瓜子个小摊头也是包“三角包”个。迭种三角包顶大个特点是，拆开来能一手握住三角下端，一手拿瓜子，吃起来交关方便。埃个辰光五分洋钿一小包，一角洋钿一大包。

　　葛末到南货店买红枣、桂圆、胡桃咾啥，店里营业员会拨侬包一种上面小下面大的方包。迭种包用厚厚个“马粪纸”（黄草纸）包成一种像削去山头个小山形状。上面再放一张红纸，纸上印有商号名称、地址、电话以及“独此一家，别无分号”等黑色字体，用水草绳十字形一扎，真是交关好看，拿出去送礼也蛮有派头。

　　而到布店里买布，包装就比较简单。勿管侬买布料还是毛料，就用一张印有某某绸缎店名个方形纸，揽腰一扎就好了。

　　讲到买水果，水果店（摊）有一种小竹片编个网篮交关有特色。网篮勿大，一般装十来只苹果或生梨，上面盖一张白底红色水果图案个方纸，罩上网篮盖，用细编个水草绳扎牢，一拎蛮有派头，比现在装勒塑料马夹袋里卖相好多了。