屋里向大扫除翻出了老早就勿用个一只蓝边瓷碗，搿是15年前买了二手房，从棚户区搬场，考虑今后准备侪用敲勿坏个不锈钢碗盏了，就拿旧个有点破损个瓷碗一趸当处理脱，顺便留下一只作纪念，碗心还刻有“费”字。看到迭只有40多年历史个蓝边瓷碗，我个记忆闸门立刻打开，思绪飞到了搭父亲一到去杂货店卖碗并刻上姓氏个情形……

　　小辰光，居住勒拉杨浦区“穷街”个居民，因棚户住房一家紧靠一家，邻里关系相处和睦，啥人家有困难、有急事体需要帮忙，邻舍隔壁侪会得主动出手相助；啥人家衣裳晾晒外头碰着落雨或夜到呒没收，邻居侪会帮忙收进；啥人家小人放学回来屋里呒没饭，邻居会盛好仔饭菜送上……因此，邻里间形成了互相帮忙、互相照顾个好风气。“远亲勿如近邻，近邻勿如对门”是埃个辰光“下只角”棚户区个真实写照。

　　正因为迭种亲和力，大家侪视邻居为“宝”——“邻居好，赛金宝”，故而物质匮乏年代，啥人家有啥好吃个，侪要送点拨隔壁邻舍，立夏煮蛋、端午节裹粽子、中秋节做炕饼等，侪会互相送吃，尤其是包了馄饨、水饺或者生日面，一家一家端送是免勿了个。埃个一碗馄饨一碗面，里向包含个是浓浓个邻里情。

　　记得我过10岁生日辰光，阿拉爷买来5、6斤面粉亲自擀面条，下好后盛勒蓝边大碗里让我每家送。伊讲，侬娘过世后侬得到了众邻个关爱，阿拉平常呒没啥报答人家，借侬个生日端一碗面略表心意！当时大排骨也买勿起，阿拉爷用青菜下面，面浪向浇头是一块素鸡搭仔肉丝炒咸菜。十几碗面送出后，还拨阿拉个碗勿到一半，倒勿是人家勿肯还，有个是忘记了，有个是小人勒拉屋里吃了面大人勿晓得，辰光一长也勿了了之，加上阿拉也勿好意思去讨——即使讨回来也分不清是勿是阿拉个，因为搿辰光每家人家买个碗侪是同样形状，颜色也差大勿多。

　　日长时久，屋里个碗逐渐减少。碗少了再添。搿日礼拜天，阿拉爷搭仔我去了长阳路齐齐哈尔路转弯角浪向个杂货店。阿拉买了大小各10只碗，埃个年代碗个图案也勿丰富，好一点个上头有些人物、花卉，价格大约两三角一只，差一眼个就是白底，外圈浪向有两道蓝线，俗称“蓝边碗”，只要一角几分一只，小碗最便宜个只7、8分一只。阿拉买了有花卉个小碗，而大碗就是“蓝边碗”。买好后营业员还勿忘问一声“要刻字？”大概想到平常辰光端送迎往比较多，搭别人家碗容易混淆搞错，阿拉爷同意就刻了。营业员叫阿拉拿姓氏写勒纸头浪向，然后用小巧玲珑个电刻字机勒拉碗心刻上了“费”字。勿要看刻上一个字，针尖大小个钻头要一点一点勒碗心钻，刻出字个形状类似现在公交车浪向个点状个移动字幕。当时刻一个字两分洋钿，记得营业员开玩笑讲，同样一个字，人家姓“丁”个只两划，侬姓“费”个介许多笔划……

　　现在买碗已看勿到刻字了。随着“穷街”个逐渐消失，老早邻里之间端馄饨送面个场景现在也少有发生了。搿唯一个一只刻字碗我也勿舍得再用，生怕勿小心敲坏脱，小心个揩清爽，拿伊放勒进玻璃橱，为个是回忆曾经个邻里情谊，回忆过往年代个社会风情；还有，就是怀念搭我一道去买伊回来并已逝去个父亲！