编者语：“邪邪气气”辣上海郊区有些地方，可以做谓语，也可以独词出现。如：“排队个人，邪气邪气！”；“排队个人多勿多？”“哦！邪邪气气！”，勿一定要讲“邪邪气气多！”搿个是省脱了“多”或“多得来”个结果。

　　上海话里个“交关”“搭仔”“邪气”可以做副词充当状语，意思是“很”、“十分”、“非常”。譬如讲“很多”、“非常多”、“十分多”，就可以将“交关多”，也可以讲“邪气多”。“排队个人交关多”，也可以讲“排队个人邪气多”。

　　但是，“交关”和“邪气”个用法是有区别个。用“AABB”重叠式，“交关”可以重叠成“交交关关”，做形容词。它可以充当补语、谓语、独词句。譬如讲，“排队个人多得来交交关关”（做补语），“排队个人交交关关”（做谓语），回答人家“排队个人多勿多”个辰光，可以用独词句回答：“交交关关。”而“邪气”重叠成“邪邪气气”个辰光就只能充当补语。可以讲“排队个人多得来邪邪气气”（作补语），却勿能够充当谓语搭仔独词句。譬如勿能讲“排队个人邪邪气气”。别人问“排队个人多勿多”个辰光，就勿能够用独词句回答“邪邪气气”。

　　另外，“交关”勿重叠也可以做形容词，充当定语。譬如讲，“有交关人辣海排队”（“交关”做形容词做“人”个定语），却勿能够讲“有邪气人辣海排队”；可以讲“有交关鱼辣海游来游去”，却勿能够讲“邪气鱼辣辣河浜游来游去”。为啥呢？原因就是“交关”勿重叠也可以做形容词修饰名词（像“人”、“鱼”等等）充当定语，而“邪气”勿重叠只可以做副词充当状语，勿能够做形容词修饰名词充当定语。所以，正确运用“交关”、“邪气”，是有讲究个。