有东方巴黎之称个老上海，虽时装店林立，但大部分上海老百姓，还是习惯去帮衬街头巷尾个裁缝铺，或者由相熟个裁缝师傅上门量体裁衣。

　　从前个辰光，每年到冬至前后，一般财力中上个人家，侪会得垃拉客堂间里搭起一只做生活台子——裁缝要来了。所谓生活台，就是垃拉朝南向阳个方位，用两块铺板搭起来个。可以讲，迭个是上海人家最早闻到个年气。一年将尽，一家大小几口，总要添点新衣裳，小囡长个子了、旧衣裳袖口毛了、丝棉袄裤要翻了……搿些侪是生活【活计】。从经济角度讲，搿些零零碎碎个生活送到裁缝铺去是勿格算个，最格算个就是请裁缝上门做一个礼拜上下，包一顿中饭、晚饭再加点心，搿能介早来晚去。作为裁缝，也最喜欢接搿种生活，自己勿用开伙仓了。

　　上海一直有男裁缝跟女裁缝之分。男裁缝侪是吃过萝卜干饭，用现在个时髦闲话讲就是比较专业，做出来个生活也比较挺括。伊拉大多有自己个铺面，做一人老板，但凡接待、量体、裁衣，里里外外就伊一个人。伊拉一般勿大会去做。上门裁缝接触女眷比较多，男裁缝也勿方便，所以一般上门裁缝侪是女裁缝。女裁缝个地位有点像梳头娘姨，但待遇要好多了：一日两餐好饭好菜招待，还有茶水搭点心，无非是希望伊生活做得卖力点。另外，迭眼跟女裁缝走街串巷、一张嘴巴能说会道有关系。旧时个家庭妇女一般侪深居简出，接触社会个面勿广，难得来一个见多识广能陪伊聊聊个女裁缝，赛过大观园里来了个刘姥姥，屋里向立时三刻热闹起来了。讲起来倒是个，朝南客堂里生活台子一搭，花花绿绿个料作一堆，再搭上女裁缝与女眷们个快乐谈笑声，连邻舍也会过来一道轧轧闹猛，茄茄山河，翻翻料作。关系好个，还可以揩揩油，夹几件生活来做。

　　这眼女裁缝，侪属于旧式女人，大多勿识几个字。照道理讲，勿到万勿得已，伊拉是勿会抛头露面出来做生活个。伊拉背后大多有一本勿提也罢个心酸史。讲起来没啥文化，但伊拉个言谈举止都十分得体，否则哪有介容易可以走东家串西家，登堂入室。伊拉大多是看勿出年纪个，好像永远胶定垃拉四十到五十岁之间。老早子，我外婆屋里就有迭能一个女裁缝桂姐。伊穿着老派，直到“文革”前，伊还是穿着一身宽大个灰布大襟衬绒夹旗袍，厚厚个淡青线袜配乌绒方口北京鞋，一只发髻倒梳得溜光的滑，夹垃一只蓝布包袱，迭身装束十分古怪，垃拉街头个回头率也相当高，伊自家本人倒邪气淡定，我行我素。勿要看伊拉能说会道，一张嘴巴其实是滴水不漏，因为搿些女裁缝都有固定个几个客户，而这些固定客户都是相熟个客户介绍而来个，所以几个家庭都是相熟个，讲闲话稍勿留神，是非一出，伊个饭碗头就要敲脱了。

　　女裁缝大多会一手好针线，但一般勿会踏缝纫机，所以伊拉只能做中式衣裳。讲起来，倒是百分之百的Handmade。外婆家个桂姐，她原是某富有人家个下堂妾，也是见过世面个，绣得一手好花，对料作个感觉十分敏感。现在回想起来，伊一手托勒肘部，一手夹着香烟个腔调，倒是很有几分风尘余韵，也老像埃些成日穿街走巷个虔婆，我勿大欢喜伊。现在想起来，我有眼后悔。如果埃个辰光我多跟伊聊聊，或许又多一个上海女人个故事了。

　　随着社会观念个开放及衣着上个改进，比如两用衫、西装裤等开始取代老派个长衫旗袍，呒没吃过萝卜干饭个女裁缝，终究功力不够，渐被淘汰，而中西生活都拎得起个男裁缝做上门裁缝也开始普遍起来了。直到后来“割资本主义尾巴”，搿道上海风景才消失。