小辰光住辣老城厢个石库门弄堂里，一到大热天，下半日5点钟敲过，住辣楼下个人家，就会陆陆续续拿出门板、长凳，辣拉弄堂里向摆起摊头：先是当作吃夜饭个台子，接下去就是乘风凉、吹牛皮个场地；当然还有就是打扑克牌、着“四国大战”个“战场”；到了半夜里，就是男小人过夜个床铺。　　

　　搿个辰光乘风凉最吃价个用具是蒲扇，用蒲葵叶做成个蒲扇，又大又硬，价钿勿贵；特别是一眼上了年纪个人，日里向走出去好挡太阳，临时落点小雨还好当雨伞。尤其是夜里乘风凉，左邻右舍坐辣一道有说有笑，手里个蒲扇一扇一摇，凉风徐徐而生，浑身凉爽舒服。牙牙学语、包括还辣辣吃奶个毛毛头，随着老人一扇一摇个凉风，慢慢叫进入了梦乡。　　

　　到了上个世纪八十年代初，空调从国外传进来了，搿个辰光个空调侪是“窗式”个，开起来声音也蛮响个。但是，伊个吸引力巨大，告别原始个乘凉方式，再也勿用到弄堂里“摆摊头”了，也勿要吃力个挥动手臂扇蒲扇了；更大个优势是对屋里有小囡个人家，有了空调，毛毛头勿生痱子了，睏觉勿会热醒了，爷娘也睏得足了。　　

　　1983年夏天，我丈母娘屋里装空调，搿个辰光装空调蛮烦个，买只空调勿烦难，要想安装蛮麻烦。侬光有钞票勿一定搞得定，先要向供电部门申领“居民空调使用许可证”。也就是讲，侬先要到供电局申请单独用个大火表。因为当时一只门号里向7、8家人家共用一只火表，一般只有5A（安倍），全部开足1100瓦，超过了火表就要爆脱。而一只空调用电量就要1000瓦，告咾一定要到供电部门申请单独火表。

　　当时辰光啥人屋里装空调，老“吃价”个，再加上阿拉供电局有熟人帮忙，所以申请个辰光还算顺利，后来付了80元手续费，然后约定辰光，供电局就来改装火表。  

　　火表调好，买空调；记得当年迭只窗式空调买个是1.5匹个“春兰空调”。也是家电公司朋友推荐，伊讲，牌子是“春兰”，实际是日本个“三菱”芯子。因为当时刚刚引进空调，阿拉自己个技术还呒没过关，比较多采用“贴牌”个办法来生产。外加比较合算个是，当时原价是6000多元，搿只是样机，所以只花了3600元。

　　搿只空调力道交关大，将近30平米个房间，只要空调一开，全房间阴凉得勿得了。我儿子出生以后，一直到上幼儿园，5、6个酷暑和严寒，搿段辰光，有了空调，省力、省心交关。