老里八早个故事：写字间里来了一个新同事。有人放出空气来，讲迭位新人来头大、排头硬，大家当心。后来终于弄明白新人个来头了，是单位里一位上司个儿子辣幼儿园里个老师个外甥囡。并且迭位上司呒没表示过要大家拨新来者有特别个照顾。一个小笑话。

　　上海闲话里个排头是指靠山。最早个写法为牌头。清宫戏里描写微服出了皇城个御史重臣到了地方浪被人小看，就亮出皇上所赐个金牌。一牌既出，众宦皆服。皇帝个牌头吓得煞人。后来牌头写成了排头，意思一样个。辣旧上海，有了或黑或白靠山可以混迹江湖，搿就是“靠排头”（也叫“隑【ghe】排头”）了。靠到了排头个脚色即使文不识斗大个几个字，武不会耍几手拳脚，照样可以凭着有来头、有排头来收敛钱财、搜刮油水，搿就叫做“照排头”了。

　　靠排头和照排头用多了、用俗了，上海老百姓就借用伊个意思了。屋里向有点家当的，下一代就被称作为“小开”。小开不务正业也能依靠爷娘个排头而勿愁衣食开销，花起铜钿银子似哗哗流水。而照排头则意义更加被开拓了。靠别人家个力道，或关系去办事件，可以叫照排头。上海闲话里照排头个意思还有总归、按照个解释。“迭只凳子坏脱一只脚，坐上去照排头要跌跟斗！”搿是总归个意思。“迭顿酒水是侬来召集个，埋单照排头也就是侬了！”这是按道理个意思。

　　有个排头狠勿过别人、凶勿过别人，就吃瘪变成了“吃排头”了。后来个上海人形容长辈训斥晚辈、师傅教训徒弟、上司批评下属，都称之为“吃排头”。“忘记脱烧夜饭了，姆妈拨外婆吃排头了。”这是老对少。“大师兄看到我迟到，请我吃排头。”搿是强对弱。“老总点名了，叫全体员工一个勿许少，大家一道吃了顿排头。”搿是上对下。还呒没听到过颠倒过来吃排头个故事：“李科长冲到张局长个办公室里，请张局长吃排头，弄得张局长响都不敢响一声……”迭点闲话只是一个笑话。呒没个。

　　“吃排头”是挨骂、挨批评。但上海人用辣自家身浪，还隐隐约约有点受冤枉、勿服气个意思。“领导请我吃排头！”内中多多少少有点牢骚、有点光火。心服口服个受批评者勿大会用吃到排头迭种讲法。“领导批评了我……”、“领导教育了我……”、“领导帮助了我……”。上海闲话是直白，但也是含蓄个。呵呵。