上世纪80年代，公历11月份刚刚过脱一半横里，老爷叔就发了调头，吩咐儿子、囡儿去买挂历，两个小囡听闲话，老爷个指示，积极响应。勿过几日天，每到下班辰光，两个小家伙手里捧个，肩胛窝挟个，一捆捆挂历，跟运甘蔗、甜芦粟差勿多，“滋溜”穿过楼下灶披间，也勿顾灶披间胖阿婆眼热个目光，一径冲上木楼梯，送到住大前楼个老爷叔屋里向。

　　老爷叔戴上老花眼镜，眯眯笑个打开一本本挂历，伊有一份名单，平常介日欠人家眼情、麻烦过人家个、老同事、老朋友、亲眷道里个名字统统辣海搿份名单浪。老爷叔一面用热气腾腾个脚爪黄豆汤招待两个小囡，一面要求伊拉再接再厉，多找几本暂时缺货个挂历。

　　公历12月中旬快到了，老爷叔写字台上头个挂历像柴爿一样堆得山一样高，老婶婶揩台子都呒没办法揩，伊日日夜夜催老爷叔拿搿堆物事送出去。老爷叔讲：“覅急，压台戏侪辣后头，再等两天，等伊拉拿一批新个来。”

　　讲是搿能讲，老爷叔自家也悄悄行动起来了。新年挂历，一到公历十二月底就差勿多像过了中秋个月饼成大饼了，再讲，早一天送出去，对方兴许有辰光转送送做一份人情。

　　最最赞，烫金个风景照挂历，送拨拉某某医院个某某医生，人家拨老爷叔开过勿少中药方子，老爷叔几十年吃下来，身体还蛮好。要过新年了，勿好忘记脱人家。伊个辰光，医生清廉，勿行收红包，过年送本挂历已经蛮开心了。剩下来个风景照，几个老护士、小护士分分，人家每天辣拉一片白个医院里向做，看看绿颜色个山山水水，多写意啊！想到搿搭，老爷叔个面孔浪向光头十足。老爷叔七十多，风度、噱头侪老好。

　　手头搿本比基尼、穿吊带衫模特挂历，巧笑顾盼个影星云集，送拨拉王师傅！王师傅是老爷叔个老朋友了，修半导体一只鼎。一年前，王师傅个太太呒没了，王师傅嘴巴里向虽然勿讲，老爷叔懂经，阿里会得勿懂伊个心思呢？

　　还有弄堂口个小皮匠，上个号头老爷叔个布底鞋子脱针脚了，叫伊缝，伊硬劲勿肯收钞票，搿份人情，老爷叔用一本大红花挂历还脱了。

　　临近年底，写字台浪向空落落起来，大前楼个门常开辣海，闻得到灶披间里冒上来个煮笋干个香味道，间或胖阿婆还会叫一声“前楼阿嫂水开了”。

　　邻居道里，照顾得着，也勿好怠慢。老爷叔横挑竖拣，拿仔一本小囡辣海石榴树下头白相个挂历走下楼去，送拨了伊，祝伊新年快乐，多子多福。

　　上期沪语谜底

　　1.对联 2.热水瓶