到浦东机场送人，回来乘地铁要有十几站。坐到了位子，可以休息一歇。面对面个两排座位坐个全是年轻人。上来一位老伯伯，看上去有近80岁了。车一动，伊有点立勿稳。老伯伯用眼睛扫一扫两排坐定当个年轻人，希望有人来让座。呒没人有反应。有立即闭上眼睛养神个，有摸出手机拨拨弄弄个，有装着看勿到个。老伯伯很响个叹了一口气。很响，勿开心了。我连忙立起来招呼伊：“老阿哥，侬过来，侬来坐!”老伯伯坐好，又叹了口气：“现在肯让只位子个只有上年纪个人了。年纪轻个打打电话、弄弄手机，忙勿过来哉……”闲话有点重了，空气里有点紧张。两个小姑娘眼睛朝伊横横。一个男小囡甚至还瞪了老伯伯一眼。我轻松一记，对老伯伯讲：“唉，我让了侬，侬还嫌比我年纪大，弄得我一点勿开心!”老伯伯笑了：“侬老后生个!谢谢侬、谢谢侬!”大家都笑了。

　　让座与勿让座现在也算一个勿大勿小个社会讨论题目。让到了座位连谢一声也勿肯个，坚决勿让座个还吵起来个，坚决要人家让座个还打起来个，电视里、生活里都看到过。只有讨论，呒没结论。让与勿让是个复杂个问题。我举例说明。还是电车票买四分、七分个辰光，一个抱小囡个姆妈上车后拉勿牢扶手，要照顾座位上个一个中年爷叔让个位子。爷叔勿肯。态度还一塌糊涂，凶得勿得了。虽然车子轧得老结棍个，但事发周围个乘客们还是忙里开了批判会。我也轧拉了里向。结果拉拉扯扯、推推搡搡，弄出了肢体接触，最后弄到了车站旁边个派出所。民警也批评搿个爷叔勿作兴，请伊吃了顿牌头。正当大家一道嗡过去个正义乘客们觉得申张了社会公德个辰光，凶爷叔用手面孔上一撸，摸下来一只假眼乌珠朝台子上一拍：“我也是残疾人!我为啥坐勿得照顾席!”原来伊是个半盲人，瞎脱了一只眼睛。大家全部厥倒。从此以后，我再打抱勿平个辰光，先要回放一记搿段旧片子。弄弄清爽事件再来作一通道理。

　　到国外去乘公共交通车子，车厢里也设有老弱病残个照顾席。尽管搿些座位空着，后来个年轻人都勿入座。伊拉个讲法是凡要占座个就先承认了自家就是老年人了。立着就是代表年轻。后来我也学会了。立牢，勿坐。回到上海后我如法炮制。结果有一趟坐127，车子很空，我也勿坐下。驾驶员回过来关照我：“老先生，请侬坐坐好。车子一动怕侬要跌跟头……”唉，老真是呒没一点办法。哪怕侬永远有一颗年轻个心。呵呵。