正如张爱玲所说，上海人确实喜欢“兴兴轰轰”。勿但做人做得来“兴兴轰轰”，讲闲话也欢喜“兴兴轰轰”。得了一个好字眼，勿但立即学着说，还要想尽一切办法来发挥，发挥到别人无法再发挥个地步。竭尽“兴兴轰轰”之能事。

　　比如“嗲”，比如“花”，比如“香”。

　　嗲 老嗲、瞎嗲、嗲唻、发嗲；嗲煞了、嗲勿煞、覅忒嗲哦；嗲啥末事嗲、嗲弗煞忒侬、嗲了勿是一眼眼；发啥个嗲，发啥断命嗲、发啥断命死忒嗲、吃洋籼米发啥个糯米嗲；还有，女人吃花功，男人吃嗲功。

　　花 上海话里个“花”，最早指棉花。上海原是棉花产地，元末明初就有黄道婆故事，至今华泾镇有纪念馆在。花衣就是皮棉，南市有花衣街，因专做棉花生意而名。花油就是棉籽油，老早食油紧张，摊头上氽油条侪用棉籽油。最明显个一句俗语就叫“花好稻好”，此花即棉花。例：“搿媒人只嘴巴会讲来，讲得来婆家是花好稻好样样好。”

　　媒人会讲话，后来，上海人将会讲话个人都称作“嘴巴老会得花个”。于是，“花”就有了“灵光”个意思。比如，“侬头发吹得老花个嘛”，“今朝衣裳着得老花个嘛”，甚至，“伊一手毛笔字写得瞎花。”

　　又因为媒人往往“扯乱话”，于是，“花”还有了点吃大勿准个意思。比如，“搿两句闲话讲得老花个嘛”，“侬迭张牌打得蛮花个嘛”，“伊两脚球踢得邪气花”。

　　为了极言其“灵光”或吃不准，上海人觉得只讲一个“花”字不煞渴，于是就有了“花嘴花舌”、“花天花地”、“花里扒啦”、“花七花八”、“瞎花八花”、“花得一天世界”、“花得一塌糊涂”。

　　最好白相，好言相劝也叫“花”。如，“老婆生气啦？侬去花花伊么好唻。”女人吃花功，莫非由此而来？

　　吃花功个，其实勿仅限于女人，领导亦辣此列。“花”，也有拍马屁个意思。例：“谢谢侬帮我到领导面前花忒两句么好唻。”

　　“花”与“头”一搭档，就呒啥好事体了。“花头”就是“名堂”。比如，“花头透唻”、“花头经多唻”等等。“花头花脑”就是勿正经，迹近“花嚓嚓”。

　　香 香字辣北语里多半只作形容词以况味或作名词如香火之香。辣上海话里，“香”还作动词，且至少有三义。如“香面孔”即接吻。也叫“香嘴巴”。另，众人分享点滴好处叫“香香”。再古老点叫“香香手”。例：袋袋里啥好吃物事啊？拿出来大家香香，覅独吞。再有，抽水烟筒亦叫“香”，如“要么阿拉一道去香一筒哪能？”

　　还有“香鼻头”，马路上两车相撞，上海人讲起来是“两部汽车香鼻头了！”1950年代末到1960年代初，弄堂里曾经流行过一首童谣，里向就有“香鼻头”。还记得歌词是：火车开过头，汽车香鼻头，公共汽车翻跟头，三轮车夫触霉头，黄包车夫买包盐炒豆……