老古闲话讲：南圆子，北饺子。正月十五北方人习惯吃饺子，伲南方人习惯做圆子。到仔元宵搿日，大家碰头问好个闲话也从“恭贺新禧”变成另外一种：“屋里向今年搓几筲箕圆子？”圆子搓得越多，表示迭家人家日脚过得越兴旺。

　　做圆子个糯米粉垃拉年前蹭好，晒干，月半搿天屋里向长辈老早爬起来，??面斩馅，跟了全家女人团团围拉垃竹箩边，一面搓圆子，一面东搭黄浦西搭海个讲张，老虫娶亲，猫哭老虫，鼠牛比武……一段接仔一段。阿拉总归坐拉垃小板凳浪，依偎拉阿奶腿边浪，看伊拉搓圆子，听讲故事，我晓得了十五吃圆子风俗个来历。

　　老早点介一到过年大家就大吃大喝，吃过半个月还留下交关菜，只好倒脱，一块揩台子个布也吃足仔油水。阿拉上海人小家败气个事体勿做个，做事体讲究派头，做个圆子特别大，至少一两半（老秤）以上，四只一碗，品种也特别多。我阿奶喜欢做四种：圆形个芝麻猪油圆子，椭圆形个荠菜肉糜圆子，一头尖尖个豆沙水晶圆子，两头尖尖个红糖枣泥圆子。只只味道赞得来，吃得人眉毛也落脱。有一趟，我嘴馋，哼庞拢总一塌刮子吃仔四只，肚皮撑得连夜饭也吃勿落。爷娘骗我，勿吃夜饭过年勿能长一岁。吓得我拿仔一把尺天天量身高，怕年岁勿长，身体也勿长。新年新世大家侪要讲吉利话，讨好口彩。葛咾只要有眼钞票，大家总归要做好多圆子，吃勿完就捞起来沥干，滚薄薄个一层面粉，放拉垃筲箕里向，挂拉垃廊檐下头，讨一个“年年有余”个好口彩。小囡要吃，或油煎，或水煮，碰碰要吃半个多月。

　　旧年回到外高桥故乡，老房子老早已拆脱，亲眷侪住拉垃小区里，日脚像老虫跌垃拉米缸里。不过伊拉还保持正月半吃圆子个风俗，吃个侪是从超市里向买来个速冻圆子，小是小得来铜钿眼也穿得过，味道远远比勿上小辰光阿拉阿奶做个大圆子。