搿歇个挂历，跟老上海月份牌有一定个渊源关系。

　　晚清，随着上海租界个畸形繁华，洋商们侪希望招徕更多生意，急需利用新颖个广告载体做宣传，但从海外运来个一眼画片呒没办法引起市场关注；乃末只好“入乡随俗”，求助本埠画家，拿带有中国民俗风情个图画印垃年历浪，再配中西对照年历，中间有戏曲故事、寿星胖娃、古代仕女等。后来，中国个民营企业也采用搿一招，使伊成为别开生面个新年画样式，拨拉市民们称为月份牌。

　　月份牌老快形成取代传统年画个势头。垃拉年尾岁首，上海勿少大报馆侪免费拿伊赠送拨订户，譬如《中外日报》馆印过上头有龙图案、两边画历史人物形象个月份牌。搿种年历既有实用性又有观赏性，所以得到了各界人士个青睐。勿少年轻画家热衷于描绘新鲜事物，追随时代潮流，穿着入时个上海摩登女性便成为伊拉表现个主角，连大明星胡蝶、阮玲玉等都被作为模特上过月份牌。同时，还出现了蛮多精心设计个爱国主义题材作品，譬如《法人求和》《梁夫人桴鼓战金山》《花木兰》《十九路军血战图》等，侪拨了市民们一种激励，慢慢成为上海千家万户必备个装饰品，并吸引了交关现代画家参与创作--伊拉侪有一套自家个本事，譬如有个精于中国画，就用勾线加色彩来画仕女月份牌；有个熟悉水彩画，就用水彩来画风景跟人物月份牌。其中，顶重要个代表人物是郑曼陀、杭稚英。郑曼陀结合自家代顾客按照片画肖像积累个经验，垃拉1914年秋天画了《晚妆图》，首创擦笔水彩画法，让伊既像照片又勿是照片，而画中女性面容白里透红、光洁细腻，产生丰润明净个肌肤效果跟逼真个衣饰质感。伊画个时装美女老快风靡整个上海，香烟公司、保险公司、印刷厂侪来订画，约稿定金预收到了几年以后。伊应客户个要求，陆续画过《杨妃出浴图》《四时娇影》《醉折花枝》《舞会》《在海轮上》等一大批描绘历史人物跟摩登女性生活个作品。杭稚英开过“稚英画室”，搿位画家个作品流行上海30年，伊设计个月份牌超过1600种，代表作有《娇妻爱子图》《吹笛仕女图》等；伊还擅长广告、商标跟商品包装设计，参与个作品涵盖烟草、啤酒、化妆品等，譬如“美丽牌香烟”、“双妹牌花露水”、“雅霜”、“蝶霜”、“白猫花布”、“阴丹士林布染料”、“杏花楼嫦娥奔月月饼盒”等家喻户晓。

　　抗战爆发后，由于政局动荡、经济萧条，月份牌开始走下坡路。到仔今朝，大家只能垃收藏机构里向欣赏搿种兼有年画功能个艺术品了。