祖上侪是本地人，

　　从小养辣大上海；

　　张口只会开国语，

　　上海闲话讲勿来。

　　勿是呒没机会讲，

　　就是有点勿习惯；

　　日长始久弄下去，

　　忘记祖宗十八代。

　　外公面孔板辣海，

　　小囡勿会上海话，

　　迭能腔调勿来三。

　　外婆倒是好商量，

　　态度显得无所谓；

　　伊讲以后要出国，

　　英格里希走四海。

　　外公一听勿适意，

　　气得胡子翘起来；

　　乡土文化掼脑后，

　　迭个责任啥人担！

　　外婆当然勿买账，

　　怪伊变得戆嗨嗨；

　　介小事体弄介大，

　　上纲上线勿应该！

　　老爸老妈急煞哉，

　　劝东劝西劝勿开；

　　担心长辈忒认真，

　　闯仔穷祸哪能办？

　　我叫伊拉覅操心，

　　皇帝勿急急太监；

　　今朝学堂贴布告：

　　“上海闲话开课唻”！

　　老师专门编教材，

　　迭能伊能教起来；

　　还要家庭多配合，

　　外公外婆做示范，

　　营造乡音好氛围；

　　民俗民风勿传承，

　　列祖列宗难交代。

　　现在阿拉拎得清，

　　各式各样侪来三；

　　国语英语加沪语，

　　三种侪会当表率。

　　外公就此蛮开心，

　　外婆同样笑出来；

　　沪语本是肉里血，

　　巴望外孙来承载！