大柏树地名个来历，文献当中大致浪有得两种讲法。其中一种是沈先生文章当中提到个，从侵华日军设置个关卡“大八辻”演变而来。当时迭个地名勿光写成“大八寺”，也有得“大八字”个写法，上海人读起来是一样个。1988年个10月份，经过市政协六届五次会议个讨论，上海市地名办公室决定按照方言谐音拿“大八字、大八寺”统一更名为“大柏树”。《新民晚报》垃垃1986年10月14号发表过一篇《地名三个字，一段屈辱史》，表示“‘大八寺’不能再叫下去了”。迭篇文章反映了当时社会浪对迭个地名个一场讨论。前头提到个政协提案，就是因为迭场讨论发起个。

　　毕过讨论并呒没因为改名方案个公布而结束，就垃拉88年，有得市民对于“大八字”个来历提供了另外一种解释。按照搿种讲法，大八字原来有一顶“东八字桥”。水电路（包括现在个汶水东路）是1925年闸北水电公司填河筑成个，整条路个东西两头各有一顶“八字桥”，西八字桥垃垃水电路搭仔柳营路交接处，现在“同心路桥”个附近。1930年代出版个《新上海全图》当中，水电路逸仙路口有个村庄叫“八字桥宅”。葛咾“大八字”也勿一定来自“大八辻”。