垃拉上海浦东农村里向，老百姓当中流行一种“望爷娘”个习俗。望爷娘，就是已经出嫁到婆家个囡儿，勿管离开娘家路有几化【jihao多少】远，只要爷娘还垃拉海，就要回娘家去看望；哪怕做囡儿个年纪再大，只要还跑【bao走】得动，就坚持要去。

　　搿搭块有句谚语，叫“立夏日覅帮人家种秧，冬至节覅去看望爷娘。”意思是讲冬至前后个白天辰光垃拉一年当中最短。早浪向匆匆忙忙赶到娘家，辰光已近中浪，张罗好中饭，还呒没脱爷娘唠白【1aoba，聊天】几声【jisang，几句】，就勿得勿要忙着回家去，到屋里辰光往往已经墨腾彻黑，所以覅垃拉冬至前后头去望爷娘。葛末啥辰光去好呢？农村里向，春耕春播，夏收夏种，秋收冬藏……一年四季忙忙碌碌。望爷娘垃拉“秋落当”，或者称为“冬闲”个春节前后头顶顶好。“秋落当”里，秋收秋种已经完成，日里辰光又长。囡儿照娘个鞋样，铺鞋底、扎鞋底、褙鞋面……脱娘做双新鞋子。会得刺绣个囡儿做双绣花鞋，鞋面浪绣“喜鹊腊梅”，迭个叫“喜上眉梢”。现在会做鞋子个囡儿勿多了，伊拉会脱娘买双轻巧舒适个皮鞋送拨辣娘，娘接过新鞋子就朝脚浪向着，还要跑两步，跳一跳，又低头看看，笑着讲：“喔哟，交关对脚，邪气适意！”

　　稻谷晒干扬尽，收藏拉草库、七石缸、栈条圈里，稡稡米【玉米】、赤豆、绿豆、黄豆、黑豆咾啥小杂粮也已拣清爽，一一放垃拉大甏小甏里，棉花早已卖脱，做棉鞋个黄花衣已经轧好。春节前头到正月半一段辰光，称为“冬闲”期，迭个辰光囡儿女婿【nixi】领仔小囡，拎仔娘欢喜吃个小鸡蛋糕、桂圆、香蕉，爷老头子欢喜个老酒、茶叶，还有鲜肉、腌肉咾啥，跑到娘家帮辣淘米炒菜，开开心心吃中饭。饭后又忙着錾肉、煮菜、拌馅头裹馄饨，还要做葱油塌饼，迭个叫“中饭恰恰【KaKa，刚刚】吃，点心又拉【yi1a，又在】烧。”直到日头落山快，再告别了爷娘回去。另外，垃拉爷娘到66虚岁辰光，囡儿会得买一块五花肉，切成麻将牌能大小个66块，一家门去看望爷娘，脱父母祝寿，愿伊拉“六六大顺”；端午节前头，囡儿买了黄鱼、黄酒、枇杷，拿仔自家裹个粽子咾啥，脱男人一道去“送礼”望爷娘。爷娘接过礼物后当场吃枇杷，点头称赞，留小夫妻吃饭。临到回家，爷娘拨拉囡儿一顶聚立【xu1iu，一种老式雨具】或一只小矮凳作回礼。

　　现在社会浪向倡导敬老新风，人人以敬老为荣。儿女常常回家看望爷娘，帮助老人汏汏衣裳揩揩浴，剪剪节掐【jiKan】，讲讲闲话，比仔买迭个买伊个更加受伊拉欢迎。