阿拉小个辰光国庆节放两日假，假使碰到礼拜日连起来就是三日。勿像现在一放就是七日八日，搿个辰光想也勿敢想。现在连得清明节、端午节也放假，还有每个礼拜个双休日，真是开心。

　　回忆起来，阿拉小辰光过国庆节最开心个就是“三看”。

　　一是看大游行。搿个辰光一年大游行有两趟。一趟是“五一”劳动节，一趟就是国庆节。阿拉屋里向住垃拉南昌路，我看大游行就到淮海路、雁荡路口去看。游行队伍从人民广场出来后分成几路，其中一路经过黄陂路就到淮海路。看大游行个人多是多得勿得了，我老早就去抢地方。我最欢喜看游行队伍里会得动个各种模型，还有就是穿漂亮衣裳个文艺队伍得仔敲大铜鼓、吹大喇叭个大乐队，神气得勿得了。大游行一般两个钟头勿到。我一直从头看到底，因为人矮，踮得脚酸也勿晓得了。现在想想搿个辰光个“胃口”真是老好个。

　　二是看焰火。日里向个大游行结束已经是中浪向了。吃好中饭就稍微休息一歇。因为夜里向还要去看焰火。搿个辰光一年到头只有国庆节放一趟焰火。看焰火也是阿拉过国庆节个一桩大事体。我有辰光赶辣辣交通管制前头到人民广场去看，有辰光就到屋里附近个马路口去看，还有个辰光索性爬到屋头顶浪向去看。五颜六色个焰火真是好看。每趟焰火放出来总会激起一阵欢呼和尖叫。记得搿个辰光有一种焰火里有小降落伞飘下来，大家就侪去抢。抢到个人勿要忒神气噢。

　　三是看彩灯。国庆节外滩、南京路、淮海路搭四川北路咾啥个彩灯邪气漂亮。马路浪是人山人海，阿拉一帮小人轧辣人堆里向东穿西跑。袋袋里向有点铜钿还好买点小零食吃吃。有趟亲眼看到马路上侪是一堆鞋子，侬想想看灯个人多?

　　我从“三看”变成了“一看”，一日到夜坐垃拉屋里向看电视，不过想想当年个情景还是蛮有劲个。