天一眼眼冷下来，家家人家屋里向侪开始翻厚被头了。现在大多数人家用个是被套、睏袋咾啥，不过老早子“”是家家人家每年要碰着个常规家务。

　　定被头前，要拿汏清爽个被面子、被夹里摊辣床浪，拨太阳晒得蓬蓬松个，再拿棉花胎摆辣当中。被夹里个四个边翻上来，包牢棉花胎，绗辣被面子浪。定被头有专门个引线，大洋码三寸长，像牙签介一根。定厚眼个被头，还要用上顶针箍。一只手辣浪上面支，另外一只手辣下面接；四面一兜，一条被头就基本定好了。勿要小看定被头个生活，刚刚学个辰光要戳破手节头，定得歪歪笡笡侪勿算啥，常庄有人拿下面个床单定辣一道，结果只好拆脱重做，弄得笑话百出。定条被头勿容易，盖了头颈迭头个头横头，又是容易龌龊，乃末为仔保持清洁，交关人会得辣被头个头横头再定一条毛巾或者搭被夹里颜色差勿多个布料，叫做“被横头”。葛末稍许有眼龌龊，嘦得拿被横头拆下来汏汏，就便当交关了。

　　埃个辰光，考究点个被头用个是丝绵或者骆驼绒；被面子侪是织锦缎个，上头绣个花色要末红花绿叶、要末游鱼飞鸟，五颜六色邪气漂亮。新结婚人家个被面子还有鸳鸯蝴蝶、百子登科个图案。搿种五花六花个被头，是新娘子老重要个陪嫁，结婚搿日天要堆辣浪床浪展示拨大家看个！