上海人顶顶欢喜吃啥？假使请崇明人来讲搿句闲话就立刻有答案了：“上海人欢喜吃哈！”崇明话里“哈”是“啥”个意思，而“哈”又与“蟹”同音，上海人真是爱吃大闸蟹。爱煞。老底仔河蟹一点勿贵个。记得四十多年前到崇明农场去务农，三四两一只个蟹也就是三四角可以称一斤。伊个辰光工资是18元一月，铜钿勿够开销，就用省下来个粮票去与老农民换蟹吃。十斤粮票可以调来一锅子崇明岛小蟹呢。江南河浜里个蟹以前侪是野生个，自生自灭。吃蟹个人多，养蟹个人少，蟹就越来越吃价钿了。十几年前大闸蟹还是称斤来卖个，最贵个年头里要买上好个大闸蟹要三四百元一斤。大多数个上海人只好望蟹兴叹。吃大闸蟹成为了奢侈生活个日程表内容。馋勿过个上海人家要吃一顿大闸蟹是屋里向个大事体了。客堂间里个好婆告诉人家“阿拉今朝一家门扳过蟹脚了”，勿但楼上亭子间、后面厢房间里个邻居要眼热，就是辣大弄堂、小弄堂里也算是一条头条新闻了。

　　最近十年里，上海人吃蟹吃出花头来。吃蟹要赶到阳澄湖去。昆山个巴城就此蟹舫林立，专门来服侍上海吃客。一帮子人去吃一顿蟹，搓一场麻将，睏一夜天，带一盒蟹回来，呒没上万元、几万元是断断搞勿定个。市场经济开放后，养蟹专业户猛增。与阳澄湖大闸蟹别苗头个，有洪泽湖蟹、有太湖蟹、有苏北蟹、还有土生土长个本地蟹。不过蟹个身价一直呒没跌下来，蟹价是与年同增。现在变化个是蟹以只头来做生意了，30元、50元、100元一只，按只论价。迭个对普通老百姓来讲，吃蟹就是吃钞票，吃勿消。

　　今年个好消息是大闸蟹终于大跌价了。原因一，反腐败以后动用公款吃蟹送蟹之风消停。还有“哈个”官员敢冒天下之大不韪去摆蟹宴、送蟹礼。原因二，据称今年恰逢蟹个大年，出水个河蟹是交交关关，蟹流如潮。上海小菜场里个蟹眼门前买十几元、廿几元一只。超级大蟹也卖不过四五十元。辣马路上打游击个蟹摊头上，价钿更加便宜。四两重个雄蟹、三两以上个雌蟹侬去讨价还价一番，一百元可以拎四五只回去。一定要弄阳澄河大闸蟹来尝鲜个念头有点勿切实际。越是叫卖得响声大个阳澄湖蟹必定是汏浴蟹。除非侬有本事听得懂大闸蟹讲闲话，听得出伊拉是昆山话还是苏北话。只要侬学会识蟹辨蟹个本事，分得清撑脚蟹，看得懂蟹门开，侬就吃福勿浅哉。今年尝蟹是好时机，千万勿要错失“蟹”机噢！