上海小人辣辣六七十年代住了弄堂房子里搿辰光，一条弄堂里一样岁数搿小人侪会辣一所学堂一个班级读书。下课回到屋里就大家一道出来白相，热天搿辰光有个大人搭好铺板让几个小人一道辣弄堂里做功课，小人老开心搿。一条弄堂，前弄堂通大马路，后弄堂出去就会是一条小马路。走来走去人蛮多。挨个辰光，阿拉住搿前弄堂一出门就是一条老有名搿大马路，侪是开了老有名搿商店。比如中百一店、食品一店等等。后弄堂就是小马路，比如有：米店、小菜场、老虎灶、大饼油条点心摊……

　　从屋里出来，只要看伊穿搿衣裳就晓得伊是往前弄堂走还是往后弄堂走。往前弄堂出去就穿了蛮整齐搿，往后弄堂出去衣裳会得皱巴巴个，热天还有人脚上穿木拖板。走起路来声音老响搿，总归往后弄堂走搿。挨个辰光不像现在有介许多行头好翻，就看啥人穿了挺括。

　　一趟，有一个爷叔搭阿姨讲，侬为啥往后弄堂走穿了介邋遢？阿姨讲，有啥关系啊！搿面侪是菜场龌龊呀，等一歇上班去要换搿。只有弄堂里有一个同学姆妈，是个电影演员卖相老好，不管是往前弄堂走还是后弄堂买菜侪是穿了老挺括个！头发一丝不乱，伊走了弄堂里人家侪会看上伊两眼！还有阿拉隔壁一个老师，穿衣裳也不马虎个，走出屋里门穿了总归老端正！其他大多数人好像侪是两套模式，往前弄堂出去一套，往后弄堂一套。一个老伯伯开玩笑讲，搿个就是两面派呀。小人一般侪穿白衬衫蓝裤子去上课，看上去老清爽搿。当然回屋里衣裳也会换掉。有个小人不换衣裳就辣弄堂里白相，大人侪要骂搿，弄龌龊，第二天哪能去上课啊？

　　天热搿辰光弄堂里就老闹猛了，特别是夜里大家侪出来了，有搿人家还搬出小台子到弄堂里来吃夜饭，菜侪蛮简单，比如毛豆子炒萝卜干、毛豆子炒咸菜，没啥大鱼大肉搿，顶多弄点肉丝炒炒，要么弄几块咸带鱼煎煎，味道吃了老好个，前弄堂后弄堂走来过去搿人侪要看一眼搿。大多数人侪会拿只矮凳一把扇子，嘎嘎三胡。还有人拿出铺板，两只凳子一搁等天暗困觉了。

　　小人到了天暗侪喜欢听故事，有个大人就讲讲童话，比如，从前有个小姑娘……大概参考安徒生个作品。还有一眼小人喜欢听鬼故事，有搿大人有声有色讲起来，还发出怪声音。有眼小人，特别是小姑娘听了吓煞了。屋里大人就会出来讲闲话了，不许伊拉再讲这种故事了，搿种故事对小人有害个，讲故事搿人还要强调，讲，搿个是古代聊斋故事。有个大人讲，再讲就送侬到派出所去。搿能弄堂里就没人再讲吓人的故事了。

　　夜里，一眼眼风凉了，八九点钟老人小人就侪回屋里了。再晚一点大人也回去了。第二天，天刚亮，弄堂里就看不见人了，最早出来搿就是住了弄堂里搿阿姨，开始清扫，只听到扫帚扫地搿声音。

　　天大亮了，弄堂里就老清爽。弄堂里又开始闹猛起来，有个往前弄堂走，有个往后弄堂走，大家开始新搿一天生活。上课辰光到了，弄堂里交关小人自家从屋里出来开始排队，低年级有老师来接，踏步去学堂上课。高年级有一个同学喊口号，排了整整齐齐，等低年级小朋友先走了，就踏步走。其实学堂离后弄堂蛮近搿，但是整齐搿队伍侪是往前弄堂走。