经常听到顾客辣辣店堂间里喊：“小姐，来调调‘骨盆’。”

　　调“骨盆”？搿个是大手术哎，饭店里个服务员哪能敢做啊！

　　其实，迭搭应该是指“搁盆”。

　　葛末，“搁盆”到底是派啥用场个呢？大概有勿少人觉着，迭个是专门用来摆吃剩个鱼骨头肉骨头鸡鸭骨头个，所以就有不少人叫伊“骨盆”了。

　　事实浪向，“搁盆”相当于一个“隔离过渡区”：用公筷拿菜从菜盆搛到搁盆，再用自家个筷子从搁盆搛到自己嘴巴里。

　　葛末歇歇调“搁盆”，尤其是高级宾馆，上一道菜就调一只“搁盆”，又是为点啥呢？因为菜式有荤有素，有烧得清淡有烧得浓油赤酱，有蘸了醋有撒了胡椒个。所以，新上一道菜之前，考究个做法是，搭大家调一只干净“搁盆”，防止菜个味道串来串去，影响品尝。

　　迭个本来是西式宴会浪个讲究，因为伊拉个大菜是一道一道上来个。后来，引进到阿拉中餐里向来，也只用于伊种由服务员一道一道分菜个正式宴会。最近靠廿年再流传到民间，不但中小饭店，家庭聚餐也开始用“搁盆”。

　　不过民间聚餐，常常各种菜色“扑扑潽潽”一台子，大家侬一筷伊一筷，味道老早就勿晓得串到啊里去了。迭能一来，“搁盆”最早个功能根本呒没办法完全发挥。

　　当然，吃个便饭，随势点就可以了，串勿串味道，呒没啥大搭界个。不过千万勿要勿懂装懂，阿勿要贻笑大方：“小姐，我迭搭垃圾已经堆勿牢了，哪能还勿来调‘骨盆’啊？”