春风吹过软绵绵，杨柳撩人痒兮兮；

　　要讲有点啥牵记，夜里炖镬腌笃鲜。

　　春天再一次回来了。

　　春笋也已经冒出来了，再勿挖出来吃，就长成竹头了，咬勿动了。

　　上海郊区有竹林个地方，比方讲松江佘山，当地人有辰光会划块地方出来，拨大家去挖竹笋，当然是要收门票呃。

　　挖出笋还要花铜钿买。迭种现挖出来的笋新鲜，掐得出水来，吃到嘴巴里会甜津津。

　　上海人也欢喜吃油燜笋，拣嫩头切成滚刀块，用开水稍许汆一汆，辰光忒长，鲜味道侪淖脱了。开油镬用油煸透了，盖好焖一歇歇就好。

　　不过，新鲜竹笋总归有眼涩，多吃胃里会潮叽叽。所以，更加多的上海人欢喜腌笃鲜：用咸蹄髈、新鲜五花肉、火腿跟竹笋笃勒一道，竹笋有荤腥轧道，就勿涩了。

　　但是，肉多了，汤又油了，所以，腌笃鲜里必定还要摆一把百叶结，袪油腻；而吃透了猪油的百叶结口感特别肥笃笃。

　　涩了，添油；油了，祛油。末事好吃，无非是荤素搭配、酸碱平衡。

　　想想人生大约摸也是迭能。