女儿从幼儿园大班开始学钢琴，从汤普森教程开始，疙疙瘩瘩，一直到拿帕格尼尼弹得行云流水，预初辰光就轻轻松松通过业余十级，拿到证书。

　　勿过，讲起来轻松，真正做起来，女儿也是邪气勿容易个。辣辣五六年辰光里，伊每个周末侪要去上课、还琴，每个暑假侪要去报名参加考级。平常辰光，每隔几堂课，老师会教新曲子，有了变化，勿会觉得厌气。碰着考级就变得枯燥了，每天练琴侪弹一样个曲子，反反复复几个月，邪气潵度。

　　勿记得了，女儿是勿是露出过勿想弹琴个意思？或者是勿想考级？反正辣辣迭个过程中，有一道学琴个同学勿高兴弹了，放弃了；也有同学本来就是弹弹白相相，从来勿去考级。不过，就算女儿想打退堂鼓，我肯定也会跟伊讲：做事体，顶好是勿要半途而废。学琴也是一桩事体。

　　记得考级结束以后，女儿还跟带伊个钢琴老师讲，想继续弹下去。老师讲，搿就要请专业老师来教了。后来因为读书越来越紧张，搿桩事体也就勿了了之。勿过，女儿应该是欢喜音乐个，因为伊到美国去读大学个头一年，尽管忙得投五投六，居然还畀伊觅着一个爵士钢琴老师，还去上过几堂课。伊还买了一只两手键盘摆了寝室里，有空还会摸摸。

　　不过，有趟仔聊天辰光，女儿问了我一句：为啥当年少年宫个芭蕾勿让我继续学下去？

　　我呆辣一呆，倒有点别牢了。现在想想，交关事体浪向，大人侪欢喜自说自话帮小人拿主意，当然，大人个理由也石刮铁硬：侪是为伊拉好。摆辣现在，可能就会让小人自家去选择：学芭蕾还是学钢琴，自家好好交想一想，多想眼辰光勿要紧，想好了就勿要后悔。