猜谜语，上海人叫“猜谜谜子”,真个蛮好白相个。“一点一划长，口字在中央，要吃儿子饭，耳朵拉拉长”——迭个勿大好算谜语个上海“谜谜子”是我顶早接触个“字谜”。其实就是拆开“郭”字个四个“零件”，凑成意思有点莫名其妙个顺口溜。头两句覅去讲伊；后头两句我小辰光一直搞勿懂：为啥“要吃儿子饭”就要“耳朵拉拉长”？去问姆妈，伊讲“侬照伊一划，字就出来了”。

　　等我长大一眼，猜姆妈出个“谜谜子”就真要动点脑筋了：像“一划卄三撇，打一字”，我拼命划来划去还要翻字典，弄来弄去呒没结果；等姆妈写仔出来才恍然大悟：就是老简单个“形”字。问题出辣我寿头寿脑，弄勿懂一个字哪能好有介许多“撇”——我拿“卄、三”当做“23”了。只好骂自家“笨贼佬”！

　　有一天交关小朋友来白相，姆妈出了一个滑稽谜谜子：“角落头，打一个字”。有人心急，听谜面一出马上奔到墙角落头睁大眼睛寻，想抢辣前头，姆妈关照“大家坐好，动脑筋猜！”几个小朋友只好回来坐停，搔头摸耳朵瞎七八嗒乱讲。有个说“灰”，有个讲“空气”，还有人乱叫“蜘蛛网”……姆妈直摇头，提醒大家“打一个字”。等了半日，大家熬勿牢催姆妈讲，看伊辣写字石板上写了个“用”字，大家统统云里雾里，只好请伊讲讲明白。姆妈辣“用”字上加两笔就成了“角”字，伊再问大家：“上面个‘头’一落脱，阿是‘用’字啊？”伊顺手揩脱加上个两笔，嗨！勿是“用”字还能是啥字呢！大家侪崇拜阿拉姆妈，叫伊“谜谜子大王”。

　　当然也有让姆妈动一番脑子个：有一天我阿姐从学堂里带回来一只高难度“谜谜子”想考伊：“上头去下头，下头去上头，两头去中间，中间去两头：打一字”。吓煞人！一个字上、下、两头侪去光，还像啥字？覅讲阿拉闷脱，姆妈也一声勿响到灶披间去了。过几分钟姆妈端着炒好个菜进来，轻轻说了声“是‘至’字吧！”一房间等饭个人全部勿响，勿晓得伊是讲啥字；只有阿姐拍手叫起来“对呃！对呃！姆妈真聪明！阿拉学堂里交关老师侪猜勿出来。”迭趟由阿姐来讲解:“拿‘去’字一拆两，颠倒装好就是‘至’字。上、下、中间、两头：讲来讲去侪搭牢迭个‘去’字。如果当‘去掉’个意思，猜到明年也勿会对！”噢哟！“谜谜子”当中确实有无穷奥妙啊！

　　记忆中还有让人笑痛肚皮个货色。一天“乘风凉”辰光有人出了个谜谜子：“手拿朝板，脚登殿班，眼睛一翻，皇帝出来。猜日常生活小事。”我拼命联想庄严肃穆金銮殿上大臣手执朝笏见驾，再到“生活小事”中去寻；但实在弄勿懂啥人敢“眼睛一翻”？直到那人笑着“拆穿西洋镜”说：“是形容有些人‘蹲坑’卖相难看”大家才笑得前仰后合——手纸当“朝板”，“眼睛一翻”当然就“皇帝出来”了。实在是发噱透顶！后来我辣一本搜集江浙地区清末民初笑话个资料中，看到过迭个谜语。