田头蔬果花向阳，河边小船划双桨；临别一枝白兰花，回去三日衣犹香。

　　天气热，所以，老清老早去买了菜，又老清老早拿菜做成了一首“诗”——事实浪向是迭能嗰，盐水毛豆、糟丝瓜绿豆芽、糖番茄、小葱拌豆腐、皮蛋西蓝花、霉干菜蒸肉，红红绿绿一台子是一日天个小菜。

　　鲜格格用手机拍仔一张照发到朋友圈，辣交关评论里侪看到迭能一句：诗一样个日脚。呵呵，表扬让人进步。

　　想想也是，其实，诗迭个物事，离阿拉也勿算远，有辰光就辣眼门前。

　　朋友菲菲个姆妈，就是一个平凡个家庭妇女，但是迭种平凡一眼也勿影响伊拿三个小人送进名牌大学，三个小人分别辣三个大城市寻着一份有出息个工作。

　　其实顶顶好嗰还是菲菲姆妈现在个状态。上趟仔几个女人碰辣一道，有人吐槽自家姆妈有点无事空忙，甚至于会得呒啥事体，就跟小人寻寻郈斯。菲菲讲，让伊拉学学阿拉姆妈，买汏烧之余，学习古诗词。开始辰光一天一首，现在越学越扎劲，一天学三首。看菲菲满面孔开心个样子就晓得了，伊拉阿爸姆妈一定拿日脚过成了一首诗。

　　新认得一个阿姨，是闺蜜个隔壁邻居，阿姨爽朗、乐开，还常常自黑，比方身体胖，比方没心没肺……空辣海，阿姨会跟爷叔两家头拿一只花园整理得花繁叶茂、蔬果满园。每趟去，总会听到伊真心招呼：蔬菜随便摘好口来！阿拉也勿客气，落苏、黄瓜、秋葵捧仔一大堆，临走还一人摘两朵香喷喷个白兰花别辣胸口头……

　　搭仔阿姨加了微信，一看阿姨个朋友圈，呆牢了：阿姨每天精读诗词已经坚持了几个号头啦。怪勿得伊个昵称是“田园”，搿是要拿日脚直接过成一首田园诗个节奏啊！

　　【沪语解释】

　　鲜格格：炫耀、多事、好表现。

　　寻寻郈斯：找事儿。

　　扎劲：带劲。

　　乐开：大方、豁达、公正。

　　呆牢：呆住。