讲起来真心汗颜，我第一次吃麻婆豆腐竟然是辣日本。

　　我出生辣上海，由苏州阿婆带大，上世纪90年代出国留学前呒没吃过麻婆豆腐，只吃过家常豆腐。记得当年刚到日本勿久，有一次与日本同学聊天，对方听说我居然呒没吃过麻婆豆腐，侪邪气惊讶，就好像我是一个假中国人。因为当时日本大多数中华料理店里侪有麻婆豆腐和青椒肉丝搿两只菜，所以，辣交关日本人心里向，伊拉就是中餐个代表。

　　当时我刚刚安顿下来，手头勿宽裕，勿舍得去饭店，就去超市买了麻婆豆腐个料包，回到住处按料包浪向个说明自家做。结果发现麻婆豆腐居然是酸甜味道嗰！迭个应该是四川料理呀。勿过，我呒没吃过正宗嗰，也就讲不出啥。

　　第二年元旦，我回上海探亲，特意叫了几个闺蜜去上海个四川饭店，品尝“正宗”麻婆豆腐。菜一端上桌，一股辛辣气味直冲鼻头，顿时打了一个喷嚏；仔细一看，豆腐表面一层淡红色个辣油，和我日本超市买来料包浪向印个图片一模一样。拿起调羹尝一口，烫！太烫了！上面一层红油起了保温作用，热量散勿出来。豆腐软嫩中夹杂着麻、辣、酥、香、嫩、鲜、烫，口感丰富。可能也是改良版了，并勿是太辣，阿拉几个上海妹子也能接受。一顿饭吃下来，浑身热乎乎，冬天好像也勿冷了。辣呒没空调个年代，能有搿种温暖个感觉完全归功于搿道麻婆豆腐。

　　今年初，我去成都旅游，虽然川菜个麻辣难以消受，但到了四川，麻婆豆腐是一定要去尝一尝嗰。最有名个当数创立于清朝同治元年个陈麻婆豆腐店，流传至今仍是网红，好食者趋之若鹜。我是第一次品尝，可这第一次却印象深刻，用“刻骨铭心”来形容一点勿为过，刻入心骨个当属“麻”字，尽管早有心理准备，一勺豆腐吃下去，还是全身侪被“麻”到了，搿种麻劲好像会“灸”，从口腔一直灸进细胞里，甚至灸进意识里。搿息辰光，嘴巴好像不是自家个了，舌头、嘴唇侪会不由自主个跳，但是跳得舒畅，跳得心满意足……由此，我真正领悟了“麻”个含义，麻大于辣，麻远胜于辣。

　　吃过最正宗个麻婆豆腐，才晓得此“麻婆”非彼“麻婆”，“川版”麻婆豆腐是麻辣口，“日版”麻婆豆腐是酸甜口。搿或许就是入乡就要随俗，适者才能生存。