上世纪60年代初，弄堂里个小朋友呒啥白相，男小人刮刮香烟牌子、打打玻璃弹子、顶顶橄榄核子，小姑娘跳跳橡皮筋、造造“房子”、踢踢毽子。同搿眼游戏相比，收集糖纸头就是邪气文雅个事体了，堪比集邮，勿仅收集成本低得可以忽略，还可以随时带到学堂里去白相，所以辣当时个小朋友里邪气流行。

　　时至今日，当时收集糖纸头个喜怒哀乐大都记勿得了。记得最多个是糖纸浪向各式各样卡通人物和动物，公主啦、仙女啦、孙悟空啦、小狗小猫啦……常常依样画葫芦照着画，画熟了，可以脱手随便画。上图画课时也可以现成搬来用。搿大概可以算是阿拉少年时期个审美启蒙教育了吧。

　　喜怒哀乐记勿得，有点操作性个过程细节倒还记得：

　　首先，埃歇辰光食品供应品种勿多，糖果算是食品店个大宗商品。为了增加糖果品种，糖果厂动足脑筋，连带糖纸包装也会花样百出成套设计。一种糖果的糖纸头图案可以系列化，色彩也可以系列化。收集糖纸头往往追求成套，缺了一张，挖空心思，寻寻觅觅，一旦弄到真是欣喜若狂。

　　其次，埃个辰光糖纸头下端正中往往会印一个数字，小朋友其实不晓得搿个数字代表啥意思。但是小朋友自己流行个规则是：数字大为贵。记得有一种硬糖，糖纸头设计印刷很简单，但是数字是五千零几十号，是当时所有糖纸头里最大嗰，收到一张稀奇得不得了。

　　第三是糖纸个材质，有玻璃纸和蜡纸两种，其中玻璃纸更加受欢迎。

　　第四，埃歇辰光食品一般侪是凭票购买，但食品店里也有少量不需凭票、价钿较高个“高级糖”，无论品质和包装都比普通糖果高一个档次。那么，高级糖个糖纸比普通糖个糖纸更有“身价”。

　　第五，每当收集到一张喜欢个糖纸，小朋友会小心翼翼地把它浸泡在温水里，轻轻洗净污垢糖渍，然后捞起来晾干并压平，这样可以提高糖纸个品相。

　　最后，相互间交换糖纸、调剂余缺是最热闹、最有乐趣个事情。有心个小朋友会把糖纸头分门别类地夹在硬质封面个记事本里，碰到一起了，相互交换翻看，看中了讨价还价。常常有占了便宜个沾沾自喜、吃了亏个懊恼不已。现在想起来，这种交换多少有点市场经济个萌芽味道了。

　　时光远去，这些画面都已褪色，现在个小朋友听了恐怕会窃笑，呵呵，天方夜谭啊！