有迭样一句俗语：“打是亲骂是爱。”辣辣阿拉上海人嘴巴里向，交关骂人闲话其实勿是骂人，反而是表达关爱个一种形式，比如：阿拉常常听到家长用“小鬼”或“小鬼头”称呼自己家个小囡。其中搿个“鬼”字（音同“举”）随便啥人看到侪难免觉得触气，好像是辣骂人，但是不管是被“骂”个小人，还是听到搿句闲话个朋友邻居，侪能从其中听出爷娘对小囡个浓浓关爱。

　　有“小鬼”，当然也有“老鬼”。上海闲话里向，老鬼一般用来形容某人老辣、精明、本事大。比如某人做事又快又好，可以讲：“搿个人做事体邪气老鬼！”上海人关于“老鬼”，还有一句形象生动个说法：“老鬼勿脱手，脱手勿老鬼”。假使某人平常精明，偶尔失算，就叫“老鬼失撇”。

　　除脱“老鬼”，上海闲话里还有一个“老鬼三”个讲法。葛末“老鬼三”是啥意思呢？迭个称呼用来指代某人，往往带有亲近个味道，比如有人讲“迭个老鬼三老来三嗰”，意思就是夸某人能干。勿过，搿种讲法只有亲近之人才可以用。假如用“老鬼三”指代某事某物，则往往是指代“难以形容，不便启齿”之物。

　　上海闲话里“鬼”还有个同义词“赤佬”。“赤佬”经常用辣勿好个地方，平常出门办事不顺利，会讲“今朝碰着赤佬了”。勿过，像“小鬼”一样，“赤佬”前头加“小”字，味道又两样了。比如小囡考试取得好成绩，就会有家长讲：“阿拉迭个小赤佬，还蛮张气嗰，搿趟考试考得真不错！”碰着小囡勿听家长闲话，家长就会讲：“迭个小赤佬，一眼勿听闲话！”

　　同“小鬼头”“小赤佬”相近嗰还有“氽江浮尸”，用法搭仔“小赤佬”差勿多。有辰光小囡出去白相，到天黑了还呒没回到屋里。家长心里总归要急嗰，往往就会自言自语：“搿个氽江浮尸，勿晓得氽到啥地方去了，到现在还呒没回来！”等到小囡回到屋里，家长会骂：“侬迭只死浮尸，死到啥地方去了？功课勿做，夜饭也勿晓得吃了！”

　　其中“小赤佬”“氽江浮尸”“死浮尸”等等，只好自家家长讲，表达一种恨铁不成钢个爱意。别人讲，家长要动气嗰！

　　有辰光有人向我讨教上海闲话，我会对伊拉讲，现在讲究以礼待人，文明用语，骂人闲话勿可以讲，但是碰着有人喊自家小囡“小鬼头”“小赤佬”，还有年长阿姨叫自家老公“死老头子”“冤家”，侬听了笑笑就可以了。“骂”字里向也有爱，用文皱皱闲话来讲，就是贬义褒用。勿过，假使听到有人讲“迭只赤佬模子”，搿就是骂人了，侬听了勿可以笑嗰！