小龙虾，阿拉小辰光就叫伊龙虾，呒没搿个小字嗰。村庄隔壁茭白塘里向小龙虾交关多，奇怪个是看不到有人去钓来吃。

　　我记得有一年放暑假，看到茭白塘里龙虾蛮好白相，忽然就有了钓龙虾个念头。钓龙虾交关简单，只要有三样物事就可以了：一根细竹竿、一根棉线、一条蚯蚓。棉线一头扎牢蚯蚓做钓饵，另一头绑辣竹竿头浪，拿蚯蚓厾进茭白塘里，龙虾就会不声不响爬过来尝味道。勿过，龙虾也是相当狡猾嗰，每次拎起竹竿，龙虾一出水就会放弃蚯蚓，“扑通”一声落回水里，迅速逃走。

　　既然勿能直接钓出水，我只好随机应变，先拿上钩个龙虾慢慢拖到田埂边，然后再快速伸手捉牢伊。呒没想到龙虾不甘心束手就擒，拼命用双螯疯狂还击，一勿当心手指就被龙虾个大鳌夹牢。俗话讲十指连心。迭个辰光手指痛得钻心，勿得勿松手，龙虾乘机逃之夭夭。后来吸取教训，一只手拿龙虾揿进烂泥，另一只手“偷袭”伊个背部，用手指夹牢，龙虾只好乖乖成为“俘虏”。

　　龙虾捉了好几只，只只壮实，看得我有点馋痨，就想拿伊烧来吃。正要放到锅子里，啥人晓得“半路杀出个程咬金”。隔壁陈阿婆跑过来讲，龙虾不好吃嗰，里向有血吸虫。我听了吓了一跳，学堂里老师讲过嗰，得了血吸虫病，肚皮会涨得像水桶，还会拿命送脱。陈阿婆个讲法虽然勿一定是真嗰，可能只是一种传说，但宁可信其有，只好放弃烧来吃个想法。出于好奇，我还是拿五六只龙虾分别装进几只大口玻璃瓶，囥到床底下，想当宠物养养白相，顺便看看有勿有血吸虫长出来。

　　第二天一早起床，想“侦察”一下龙虾个情况，不看还好，看了目瞪口呆：只只瓶子全部空脱，里向个龙虾逃得无影无踪。连忙到角角落落里到处寻，终于辣辣水缸边浪拿伊拉捉回来。后来翻翻科普书才晓得，血吸虫要用显微镜才能发现，而且血吸虫主要寄生辣钉螺里向。

　　想来当年第一个吃龙虾个人，就像第一个吃大闸蟹个人，要有勇气，要有胆量。讲起来也巧，有一天到离屋里三里远个殷行铁路旁边村庄白相，碰到一个爷叔辣辣铁路沟里钓龙虾，问伊派啥用场。爷叔讲“吃啊。”“勿是听说有血吸虫个吗？”“铁路沟清爽，呒没血吸虫，只要烧熟烧透，虫啊菌啊侪能杀脱嗰。”“啊！”我茅塞顿开。

　　回去以后再钓龙虾，一个钟头收获八九只。用井水汏干净，锅子里放水放盐，龙虾放进去，烧到汁水收干，呵呵，味道勿比大闸蟹推板。