有趟仔，也差勿多是搿歇辰光，回绍兴老家去白相，阿拉绍兴大阿姐送仔几袋藕粉。

　　藕粉装辣塑料袋里，看上去平平常常，其实是大阿姐晓得阿拉要回绍兴，立时三刻去市场买仔新鲜藕，自家辣屋里亲手搓嗰。

　　阿姐从来呒没讲过搓藕粉有多少辛苦。不过，前两天辣一只视频里看到了：先要拿藕从泥里挖出来，一节一节汏得煞辣斯清；然后辣一只大盆装满清水，里向搁一块像汏衣裳搓板大小个特制搓板——一块金属板，钻满小孔，钉辣木框浪向；人辣小矮凳浪向坐好，藕捏辣手里，用力辣搓板浪搓。藕一点一点被搓成碎屑，落进清水里，慢慢交，一盆清水变成乳白色藕浆。再像从前上海人做水磨粉一样，藕浆用纱布过滤、沥干，藕浆辣纱布里结成粉团；再拿粉团摊薄，摆进泥砌炉灶，低温烘干后碾成粉末，藕粉就做好了。

　　看视频勿算太复杂，勿过，真正做起来，一定老辛苦嗰。

　　冲藕粉吃勿辛苦，但是也有窍开。粉太多，冲出来厚笃笃，吃起来黏滋疙瘩像浆糊；水太多，薄溏溏里要“茄脱”（糊状物变稀，不黏了）。冲一小碗藕粉，用浅浅交一调羹藕粉就可以了，先用一眼眼冷开水化开来，搅成浆，再一边拿沓沓滚个开水冲下去，一边调匀到适当厚薄。搿能冲出来个藕粉勿会结块，色泽通透，吃口爽滑，有天然香气；而一勺糖桂花极有可能喧宾夺主，勿要也罢。