辣上海闲话里，“阿”字勿但大派用场（特别辣称谓浪向），而且读音稍微变化一眼，伊表达个意思就会勿一样。

　　上海人叫祖父、祖母，为老爹、阿奶；浦东人也有叫大大（da）、奶奶（na），或者叫阿大、阿奶。对于一般上了年纪个老人，家长会对小人讲，叫阿公、阿婆，搿个是泛指，表示对年长者个尊敬。假使搿个“阿”字发音短促，勿称“阿（a）”，而是“呃（e）”，葛末，阿公、阿婆就成为女性对公公、婆婆个称呼。

　　同样，对于父亲个弟弟，叫爷叔或阿叔；母亲个姐妹，称阿姨；母亲个兄弟叫阿舅（或者娘舅）；而“阿叔”就变为女性称丈夫个弟弟；“阿姨”就是男性对妻子个姐妹个称呼；“阿舅”就是男性对妻子兄弟个称呼。

　　由此可见，上海话里向同一个字，发音略有变化，表达个意思就会勿一样。其实，搿种情况辣江南吴语地区并勿少见，比如苏州人叫祖父为阿爹；假使用苏州闲话个发音和声调，听起来嗲声嗲气，交关受用。