沪语里有句嘲弄人个闲话，叫做“烂铅皮冒充克罗米”。意思是讲明明一块勿上台面个“烂铅皮”，却装模作样，去冒充弹眼落睛个“克罗米”。葛末啥叫啥“克罗米”呢？搿个是指金属制品个外表，经过银白色个镍元素电镀后，产生了耀眼个效果。由于垃拉常温下，镍勿会告【与】空气里个氧起作用，所以迭种“克罗米”金属制品勿会生锈，蛮讨人欢喜个。但是假使一个人个处世为人，并非的的刮刮【实实在在】个“克罗米”，而是“烂铅皮”冒充个，搿就出毛病了——碰着迭种户头，侬肯定要厥倒【晕】！

　　记得老里八早我住辣石库门个辰光，贴隔壁邻居叫阿海，蛮虚头虚脑个。随便啥事体，伊老欢喜摆“飙劲”【逞能】。勿但嘴巴浪老三老四，而且行动浪常常会鲜格格表现一番。结果因为底气勿足底子薄，常常弄巧成拙。譬如一道辣辣灶披间里烧夜饭，伊总要东惹惹西惹惹。看见人家烧啥个菜，总归要评头论足一番，应该哪能个，勿应该哪能个……弄得来伊像“侪懂【全能】大学”毕业个！有趟仔我想烧只麻辣豆腐，心里呒没底，正辣海犹犹豫豫，伊自告奋勇叫我让开，由伊来操刀。啥人晓得伊“起个咙咚锵”【一阵忙活】过后，“狗头浪抓抓、羊头浪摸摸”【东一榔头西一棒子】，完全呒没章法。伊摆起作料来，勿是辣摆少了，就是醋摆多了，乃末只好穷摆糖，最后烧出来迭碗豆腐，变成糖醋加麻辣了。害得我老婆当场现开销，讲侬哪能好相信伊迭种“烂铅皮冒充克罗米”个人啊！阿海横打招呼竖打招呼，一副拆仔烂污【闯祸】戆嗨嗨个“吞头势”【模样】，叫人哭笑勿得。

　　联系眼门前个实际，我发觉阿拉现在好像经常会碰着“烂铅皮冒充克罗米”个事体搭仔人；“以次充好、以假乱真”个现象到处可见；一些黑心商家“摆花板、打闷包”个陷阱邪气多——像促销打折、网购快递、旅游消费、食品药品、电讯短信咾啥……真是“圈套连连、把戏多多”。一勿当心，侬就稀里糊涂拨垃冒充“克罗米”个“烂铅皮”忽悠、蒙骗、欺诈了，实在有点“吓人倒怪”【可怕】！所以我今朝搬出迭句上海闲话来提醒大家，一定勿忘记增强防范意识，走辣人生道路浪，就要像过“地雷阵”迭能，时时小心、步步为营——搿个勿是危言耸听，而是现实拨垃阿拉个警示！