我曾经是身在异乡为异客个上海人，辣辣纽约，我寻到了上海滩浪难以寻得到个一样宝货——世界各地个老烟缸。

　　迭些世界各地个烟缸，足以体现纽约个移民特征。同样是烟缸，每个国家、民族、时期勿同，搭仔每个匠人各种各样勿同个创意。目前我收藏到个烟缸有中国清朝个宫廷彩绘，有沙皇时期个贵族铜像，有二战期间欧洲战场个三马图，有比利时神话童男拆水【小便】个雕塑，有意大利惟妙惟肖个甲壳虫，有呈现印地安土族打猎风俗个造型，有极具原生态非洲个美女顶缸，有泰国皇族个贵妃出浴，还有日本大和民族膜拜个星象图咾啥近二百只，可谓林林总总精美绝伦。每趟欣赏迭些作品，让我为之感叹人类个想象力实在丰富，每个国度文化个卓越，每个民族表现手法个特异。虽然本人平常抽烟，但每当点烟灰辰光就勿舍得去打扰伊拉，垃拉我心目中烟缸个分量是沉甸甸极为厚重的……

　　原因蛮简单，为了觅到迭些小物事，我化了交关日脚，用了吃奶力道，跑遍了纽约搭周边城市，啥地方有古董集市，啥地方有跳蚤市场，啥地方有小型拍卖，我侪呒没漏脱。无论出差还是旅游侪会事先做好功课。勿过我个爱好拨拉交关人当做“冷门”。交关烟缸侪是伊拉美国人爱勿释手个传家宝，其中有红铜黄铜、抛金镀银、石雕木刻、玛瑙玉器，还有玻璃高仿，但我碰到华人卖家，尤其是生活辣辣唐人街个中国老移民就比较“老鬼【ju】”，晓得我特别钟爱老烟缸，要末价钿拉得老高老高，要末搭我调换旧瓷器、老式鸦片枪、象牙麻将牌；赛过搭我做“补偿贸易”，乃末我常常一记冲动就会成交，迭个大概跟我属老虎有关系，一激动就会得冒险。而老外侪为我个收藏创意给予鼓励，寄希望我拿收藏个烟缸拿到中国搭仔亚洲各地去展示。叫啥美国纽约收藏家协会还特特为搭我颁发了该会常务副会长个聘书，以肯定我独特个收藏“业绩”。美国最大个华人日报《世界日报》采访问我：“侬花介许多心血搭财力去收藏旧烟缸，有啥个价值搭仔意义？”我讲：“收藏欣赏小烟缸，了解精彩大世界。”