初夏，田里放满水，等待莳秧，迭个辰光，稻田里侪是泥鳅、跳跳鱼、那摩温、田鸡、癞蛤巴……埃搭就成了伲小囡白相个天堂。阿拉欢喜捉那摩温来养，更加欢喜捉跳跳鱼。

　　大大个脑袋，圆圆个眼睛，青蛙一样个两条后腿，跳跳鱼怪模怪样，逗人喜爱。养辣瓶里，放几根水草，伊辣水里迭根水草窜到伊根水草，一歇勿停，像只青肚皮活狲辣辣树浪向荡秋千，让人爱勿释手。勿过，跳跳鱼浑身滑腻腻，侬看准仔扑过去，它一记就从手里向滑脱，一蹿就勿晓得迓到仔啥地方，碰巧拨侬捉牢，也难养活。 

　　有一趟，小朋友约我去小河浜汏冷水浴。我阿奶勿让我汏冷水浴，讲是村里前抢巴沉杀仔一个小囡。后来，我还是迓过伊眼睛，伲到水田里胡天野地白相，弄得满身泥水，好容易捉仔一条跳跳鱼，寻来瓶子，灌满水，鱼从我手里滑进去，摆几根水草、两粒米饭，囥辣灶间。第二天，鱼翻白肚皮浮辣水面，死脱了。我伤心得哭仔半天。

　　阿奶叫来堂叔，让我跟仔伊去捉跳跳鱼。一路浪爷叔教我交关知识，伊讲勿论陆地水面，跳跳鱼逃起来飞快，用肺呼吸，能潜辣水底老长辰光，浑身滑溜像泥鳅，洞又深，用手难捉，只能用网兜。一二尺小网，用竹片爿支开，紧贴水面，人沿田埂走，脚步拿鱼吓下水，鱼怕水烫，拼命辣水面跳，乃末侪收网底。搿日白相得老开心，捉到仔大半碗跳跳鱼。奶奶拿伊烧了汤，辣辣三年困难辰光，实在是开荤了，阿奶一边吃一边讲，鲜来鲜来！

　　后来我个生活像鞭子抽个陀螺一样急速旋转，我再回到故乡，稻田里洒满农药，跳跳鱼老早呒没了。前一抢，看到报浪讲铜川路有跳跳鱼卖，我去一看，乖乖隆底咚，价钿比一般鱼要贵三十倍。