我最近有点烦：屋里向介【这么】许多人讲上海闲话，4岁多个外孙居然勿会讲！伊只会讲普通闲话。每个脱伊【和他】讲闲话个大人，生怕伊听勿懂，一律换成普通话。迭能末【这样】，侬叫伊哪能会得讲上海闲话呢？

　　伊叫起爷爷奶奶来口齿清爽得一塌糊涂；叫伊用上海闲话叫外公外婆，伊是疙里疙瘩：“啊-公”“啊-婆”。再讲我囡儿迭个一代，快要三十出头了，拿“我”读成“吾”。迭能末，外孙搿代完全拷贝走样了。侬唱：“朗朗朗，马来了”，外孙只会“唐僧骑马咚啊咚”；侬唱：“落雨喽打烊喽，小八腊子开会喽”，伊戆脱，自顾自唱北方儿歌：“小老鼠，上灯台，偷油吃，下不来。”教外孙讲上海闲话，我看有点紧迫。我个方法是，用上海闲话拨伊【和他】讲故事。夜里睏觉前，我就讲“双语”故事。先用普通话讲一遍《东郭先生和狼》，再用上海闲话复述一遍。讲到要紧关头浪，我问伊：“迭个辰光狼讲啥啊？”伊尽管完全听得懂我个沪语版故事，但只会用普通话讲：“我要吃了你！”教伊《安徒生童话》中“卖火柴的小女儿”，换成“卖自来火个小姑娘”，讲发讲发，我自家也卷起了舌头，讲起了普通闲话。我再一个方法是，关键对话用上海闲话讲，一日，我用上海闲话讲：“侬自家去穿好鞋子，外公等歇开车子送侬到爷爷屋里向去。”开车路浪，问伊：“侬为啥介要到爷爷屋里去？”“我喜欢爷爷奶奶。”再问：“侬喜欢外公外婆吧？”“也喜欢。”“葛末今朝就勿要去爷爷屋里好？”伊一记头闷脱：“我，我就要去爷爷家。”突然，外孙急出一句上海闲话：“朋友帮帮忙。”“朋”字还读成【pong】！

　　上海小人哪能会讲勿来自家个方言？我看是上海人自己掼脱个。啥个道理？自家勿舍得掼脱个话，总归垃拉自家屋里向个，赛过压拉箱底下头个全毛中山装、开司米细绒线、对襟织锦缎棉袄。我出一个让小囡学上海闲话个主意：幼儿园招生个辰光，索性加试上海闲话！乃末扎劲了，保证屋里向大大小小侪重视了，勿要忒灵噢！