首先要讲清爽个是，阿拉上海闲话里个“大”通常都念作“肚皮”的“肚【du】”，所以爆大米子就念作“爆大【du】米子”。现在可能小一眼个小囝侪勿晓得“爆大米子”是啥个东西，但稍许大一眼个人应该侪晓得个。因为垃拉过去，阿拉崇明乡下头，爆大米子是阿拉搿种小鬼【ji】头个一种零食，当作小吃物事，用当今时髦个闲话讲叫作美食。 

　　记得阿拉小个辰光，经常能够看到一些垃拉小车子浪推着“爆锅”个人游走垃垃乡下头个宅伴里，大声吆喝：“爆大米子喂———，大米子爆 ———”。只要有三头五 家人家想“爆”，伊就停下来，卸下“爆锅”，开始露天营业。侬还勿要小看乡下头个老头老太或者是妇女小囝，凡要爆大米子个一律自动排队，也勿需要强制叮嘱咯，各家各户侪规规矩矩排好队，假使啥人有事体想先“爆”，自家会得和前头个人商量咯，秩序倒真个是蛮好咯。 

　　说起爆大米子，其实也老烦个，要带邪气多个物事到现场，除了玉米或者大米搿两样主料外，还要带好燃料，一般侪是“大【du】米节头”（乡下头玉米剥下来后的芯子），或者木柴爿，还有糖精，装“大米子”个畚箕，干净且密封个油子袋，确保“大米子”松脆而勿发软。通常都要备齐了搿些物事后才好耐心地排队等候。记得搿辰光开锅时个情绪是邪气紧张个，因为开锅个辰光声音是老响个，就像放炮仗，阿拉搿种小囝总归要用手拿两只耳朵管抵牢，否则耳朵震得来精灵精灵响。

　　爆大米子个师傅也蛮有一眼技术个，特别是垃拉掌握辰光浪向绝对有讲究，假使辰光短了，“爆”出来个大米子就半生勿熟，有些还呒没“爆”出来，假使辰光长了，“爆”出来个“大米子”就会焦脱。搿歇辰光爆大米子个师傅非但拿勿到加工费，还要赔偿本家个玉米或者大米，想想伊拉寻铜钿也是老惨个。搿辰光个爆大米子还能看得出一家人家经济条件个好差，一般个人家侪是“爆”一锅个“大米子”（玉米），而条件好一眼个人家就会得“爆”上一锅大白米个，甚至爆一些年糕或者饭糍耙，因为搿辰光个米是老稀奇个，平常辰光吃也吃勿着，根本勿舍得“爆”个，有得“大米子”吃吃开心煞特勒，也算得上是一种奢侈个享受。 

　　讲起爆大米子，阿拉随手还有一个小笑话，说是一个外国人看到阿拉中国个爆大米子，觉着老稀奇个，就问中国记者：“搿是啥个物事？”中国记者对伊讲，迭个是阿拉中国人发明个，叫“粮食扩张器”。外国人似懂非懂地点点头，自言自语道：“怪不得中国介大，人又介多，粮食倒是足够吃个。” 

　　现在原汁原味个爆大米子虽算还呒没完全消失，但已经很少看到，更是很少吃到了，据说是拨一种叫“哈立克”个食品替代了，加上了牛奶塔子黄油，又甜又香，相当可口，成为了现今小朋友个真正美食。尽管现在个乡下头也勿比过去，小囝吃个物事搭仔城里人一样，但想起老里八早乡间个爆大米子，留垃垃阿拉搿代人脑子里个烙印还是老深刻个。

　　亦君/画