我是复旦大学的一名在校学生，既是一名新上海人，也是新民晚报个读者。来上海勿过两年，我已经对搿座城市个历史、文化产生了浓厚个兴趣。特别是上海闲话版刊出以后，加深了我对上海方言搭上海人生活个了解。我也邪气关注上海方言个传承和发展。通过平常个积累跟细心观察，有了对上海闲话个进一步认识，希望自家能更快个融入上海。

　　我是的的刮刮个新上海人。两年前头，当我拿起背包跑出浦东机场个辰光，就要紧想望望上海真实个样子。齐巧迭个辰光，发生勒意外个收获，拉拉开往市区个大巴车前头，一个上海阿姨跑过来搭我讲：“朋友，侬到啥地方？”看我糊里糊涂，阿姨豪燥变成功浓重口音个普通闲话。介简单个言语，却让我感受到扑面而来个上海味道，迭个就是我收到个第一张上海名片——上海闲话。 

　　上海闲话，老早拨我个印象是模糊、负面、俗气个，伊被赋予交关地域歧视个含义。直到生活拉拉迭座城市，每天品味伊个气息，我才觉着上海闲话个价值搭仔活力是一道勿可忽略风景。 

　　上海闲话是上海人个母语。母语能传达老真实个情感，辣辣街头巷尾，我听到交关上海人个问候，“侬好”“饭吃过 ？”“搿抢身体好 ？”“谢谢侬”“再会”，软糯中夹带亲切，平实中饱含温情。有辰光，我也会得碰到上海人个脾气性情，“做啥啦？”“哪能？哪能？”“脑子坏脱啦”，眼看寸步勿相让，火山可能爆发，却辣末生头停脱啦。原来上海人侪晓得适度原则，得不偿失个买卖从来勿做。 

　　上海闲话也是上海生活个丰富体现。一个新上海人，可能勿会得讲上海闲话，但是某些传神个上海词汇老早就派用场了。平常工作辰光，我会得听到“拎得清”“淘浆糊”“勿搭界”，休闲时，我会得遭遇“十三点”“洋泾浜”“豁翎子”，拖着慵懒尾音告讲拨你听“好勿啦”。看来浑然一体个上海气质呒没上海闲话，味道少仔交关。 

　　上海闲话还是上海文化个重要载体。搿两年，有关上海话保护搭传承个信息邪气多，蛮扎劲个，实际浪向是迭座城市文化认同个衰退危机。蹲拉上海，我搭交关上海人轧朋友，发现伊拉侪接受了多元开放个新式教育，遗憾个是，伊拉为此付出了相应个代价，搿就是母语上海话精髓个消退。假使有一日，上海闲话呒没勒，勿晓得阿拉会得是阿里种心态去面对？ 

　　上海个城市节奏老快个，立辣十字路口个上海闲话，就像大观园里个刘姥姥，有眼搞勿清爽。作为新上海人，我珍视上海闲话个独特魅力，也期待上海闲话能走好自家个路，尽量保持那恬淡与优雅吧。