朋友道里茄山河，讲上海人讲究翻行头，随便阿能介个衣裳侪敢穿身浪。是个，但也勿侪正确。

　　上海滩从晚清《五口通商章程》出台，东西方文化交融，各式各样服装鞋帽粉墨登场。1860年开始，“时髦”二字定格沪上，“海派”服饰一时浪头成为仔引领全国服饰时尚个中心城市。伊做工考究、面料吃价、款式新鲜、品种海威。所以讲，辣穿着高头一直相当新潮大胆。可惜“大跃进”年代，老百姓袋里呒没钞票，连肚皮侪填勿饱，假使啥人有件把登样眼个白衬衫，脚高头穿双7块5角6分个猪皮皮鞋，乃末一弄堂人眼热煞，会跷大节头：啧啧，时髦来，顶脱哉。辣我刚晓得打扮个辰光，覅忒刮三噢，服饰个命运彻底遭到“秋风扫落叶”。三天两横头有人落到拨撕烂花村衫，剪破小裤管个悲剧……当初我穿过一双“懂经”鞋，差点惹出场风波。讲迭种鞋子像煞勿曾看见过，阿是?爷弄来个外国货？侬年纪小小，穿奇装异服，资产阶级思想严重，还勿换脱？就拿伊厾进苏州河里喂【yu】鱼！吓得面孔夹料势白，豪燥脱脱仔囥辣箱子底下。

　　“欲加之罪何患无辞。”其实照现在看，搿只是双普普通通黑颜色个布鞋，小方口，鞋帮两旁边镶两块二指半宽个松紧带而已。要命，朝我凶声凶气训斥个人天生大舌头，闲话讲勿清爽，拿松紧鞋讲成“懂经鞋”，埃歇横【wang】里我勿欢喜穿跑鞋咾啥，因为出脚汗臭烘烘难闻【men】得要死【xi】。鞋子是姆妈扎鞋底、上鞋面一针一线亲手做个，样子又好看又跟脚又透气又轻巧，但是人家勿允许我穿。我心里穷殟塞，心心想哪能穿仔就成资产阶级思想严重了？接下来事体更加滑稽、更加残酷。“破四旧，立四新”，街浪向男男女女穿清一色蓝卡其上衣、黑剥落拓颜色个长裤；要末就穿假洋头个军装……搿种日脚一直延续到“文革”结束。

　　只有辣国泰民安生活当中，方能显出阿拉上海人穿衣裳百花齐放个勇气搭风格！