采访世界杯要有好笔头、好身体、好外语。前两项我是强项。两个钟头里我可以写出近8000字个稿子。我还可以三天三夜勿困觉做我欢喜个事体。外语是我的弱项。虽然我从中学到大学读了八年个英文，但勿用功，“英格力须”交关交关蹩脚。亏得踢足球、看足球、写足球、评足球呒没太好个外文也来三。足球也算一门世界语，任何国家、任何肤色个人都看得懂。何况我还是一个漫画家，以图画来代替语言交流呒没问题。中国个文字就是从象形文字里发展出来个，讲不来外文个车子、房子，画部车子、画幢房子，外国人看得懂个。辣球场里，辣看台上也勿太需要外语，进球了就随着大家喊，失球了也跟牢大家喊。就是用阿拉上海闲话来吼叫，也呒没啥人来白侬个眼睛。大家开心。

　　勿会外文，上馆子吃饭是个问题。一本餐单送上来以后，我是文盲干部，一行字看勿懂，一只菜点勿出。服务生很有修养，毕恭毕敬立辣我旁边。我勿紧勿慢摸出白纸簿，三笔两笔画出一只鸡来。服务生奇怪煞脱了，眼睛瞪得老大，嘴巴也张开了。不过伊还是老聪明灵活个，伊马上领会了，客人想点一道鸡肉个正餐。前菜是沙拉，还得有盆汤。搿就随服务员高兴了，反正送上来啥我就消灭啥。吃得老满意个。辣美国个辰光，我就多拨点小费，来奖励服务生“看图说话”个本事。辣成功培训了搿样一个善解图画个服务生之后，搿家餐厅就成了我个定点饭店。只要我一进门，伊个服务生就迎上来。看得出，伊也欢喜我搿个与众勿同个老顾客。我画牛，就上牛排。我画鱼，就上鱼排。一天我画了鸡，服务生马上连连点头：“OK、OK！”我讲：“NO！NO！”伊有点呆顿顿了。我辣纸上画个鸡屁股后面又画了两只圈，还画了箭头指向搿两只圆圈。服务生笑出声来，伊又弄懂了，我要吃鸡蛋。我马上又画了头牛，牛肚皮下还添了大奶奶，添了几滴奶水，箭头一指。我相当愉快个尝到了煎蛋，喝到了牛奶。我以图画点菜吃饭，呒没一次以失败告终个。当然，认得我个餐厅也对我扫了盲，让我辣几天里学会了讲洋文个交关菜名。我去过法国、德国、俄国一大串国家，法文、德文、俄文前学后忘记，还是我个图画派用场，捣浆糊式外语畅通无阻。

　　画图，是我一生个薄技。学勿好外语个，就快点去速成画图。带好一支笔、几张纸，保管侬走遍天下。哈哈。