大地回春，惊蛰一过，清明前后，辣拉老早阿拉小辰光（也要五六十年前了），学堂里就会组织学生子远足，现在末叫春游。埃歇辰光呒没条件跑到外地风景区，只是到郊区野外踏踏青，看看人家农民伯伯辣拉田里插秧种菜做生活。除脱欣赏河边垂杨、牛羊鸡鸭、农舍炊烟，有辰光还点篝火烧野餐，倒也是一乐；或者呢到公园做做游戏，爬爬假山，“官兵捉强盗”，跳跳集体舞，虽然讲当年远足交关简朴非常普通，呒啥花样经，但今朝想起来还蛮有趣个。

　　不过，埃歇辰光小朋友还有自家个玩法，春天里约好几个淘伴一道到郊外去白相。当年个郊外无非就是浦东。记得有一年我搭仔弄堂里个两个邻舍到浦东去折杨柳、捉蟛蜞、捞“拿摩温”，“拿摩温”也就是现在讲个蝌蚪。蝌蚪为啥叫“拿摩温”，据讲有好几种说法，就勿去“打碎砂锅问到底”了。阿拉带好瓶瓶罐罐，先到高昌庙江边码头，再乘摆渡船到浦东。浦东当年侪是农田，一望无际，到处是池塘、河滩头。几个小顽童先是拿出捻凿，辣拉小河边泥洞里捉蟛蜞，捉了几只蟛蜞后，又用旧袜子做成个小网兜辣河浜里捞“拿摩温”，再捞几根水草，一道放辣瓶里向。捉蟛蜞自然勿是为了腌了喫，侪讲蟛蜞是有毒个，勿能喫，只是白相相，一两天后就死脱了。而捞“拿摩温”是为了养，就像现在个宠物一样。埃歇辰光“拿摩温”一般是要到小贩搿搭买个，一分几条两分几条，买“拿摩温”可以搭一两根水草。不过辣拉瓶子里欣赏自家捉来个黑黝黝个小蝌蚪，辣碧绿个水草里游来游去，迭种开心呒没闲话唻。过几天小蝌蚪慢慢叫长出了脚，尾巴褪去了，变成了黑黑个小田鸡，辣拉瓶里跳上跳下，真有讲勿出个成就感。

　　至于春天辰光折杨柳树，倒是用来派用场。小学生时代我喜欢画国画，要用炭笔打草稿，买炭铅笔要铜钿，而且小个文具店还呒没买，只好“就地取材”了。于是就折几根粗细适中个嫩柳条，回转去剥脱树皮，削成毛笔状，勿是很尖，再辣拉煤球炉浪烤，使得柳条碳化，就变成一支炭笔，可以辣宣纸浪打画稿了。弄堂里有一位老先生就是用柳条当炭笔打画稿个，效果要比炭铅笔还要来得道地。尽管我呒没成为一个画家，但当年认认真真用柳条做炭笔个情景,是永远勿会忘记个。