现在，小菜场里卖葱姜个阿婆也用智能手机“支付宝”来结账了；回过头去，30多年前，啥人腰眼里别一只数字寻呼机，已经老有腔调了。由于早期个寻呼机发出来个是“B-、B-”声，因此大家侪叫伊“BB机”。当时买一只BB机就要两三千元，而一般人个工资只有几百元。

　　最初BB机只能显示数字，外形尺寸与火柴盒相当，可以轻易放进衣袋或用卡扣别在腰带上。一旦接收到寻呼信号，伊会发出“滴滴”声，提醒机主查看。为了不干扰别人，也可以关脱声音，调到振动档，收到寻呼信息，机器就会发出一阵阵震动，只有机主本人可以感觉到。

　　1983年9月，上海召开第五届全国运动会，为了保证通讯联络畅通，上海邮电通讯开发公司（国脉前身）创建，引进了当时还是很先进个寻呼服务，号码为126。126完全依靠人工服务，由寻呼台话务员转发电话号码，机主可以根据BB机浪显示出来个号码回电。

　　再后来，又开通了127自动寻呼服务。就是人家寻侬，打了127号码，接通以后直接拿伊个电话号码输进去，侬个BB机就会显示对方个电话号码，侬就可以回电了。

　　现在看来，搿种BB机邪气原始，但当时有只BB机往往可以派大用场。交关轧朋友个男女青年，通过伊“互诉衷肠”；交关工作岗位浪个责任人，通过伊“错时召集，不误工作”；还有人用它叫张三、呼李四，欢聚小酌……公交车浪、小聚之时，只要听到“B-，B-”声，就会有机主一脸满足地撩起衣裳，从腰间掏出BB机，面孔浪个笑容就像开了一朵花。

　　勿过，搿种“B-，B-”声有辰光也会带来烦恼。我有一个朋友，是一个医生，自从医院为伊拉配备了BB机，只要机器一响，勿管日里、夜里，伊侪要赶到医院去看急诊。有一年春节，伊辣辣姆妈屋里吃好年夜饭回来，揩过面、汏过脚，困到床浪刚刚打呼，突然听到BB机响了，以为医院里又有急诊，只好从热烘烘个被头筒里钻出来，急急忙忙穿好衣裳，赶到附近商店打电话（当时私人住宅很少有装电话嗰）。拨通BB机浪显示个号码，刚刚讲了一句“我是某某某”，就听对方讲，“哎哟对勿起，打错号码了！”侬讲伊胸闷口伐？

　　再后来，“中文寻呼机”横空出世，也有人叫伊“汉显”，寻呼号码是128。寻呼台话务员可以拿客人个留言发送到寻呼机浪，用中文显示出来，搿能就不需要再打电话问有啥事体了。与之前个数字寻呼机相比，中文寻呼机极具优势，所以一经推出就大受欢迎，用BB机个人纷纷换机。勿少人买了搿种BB机，热天当然是挂辣腰带浪向，就是到了大冷天，也要拿伊放辣显眼个地方，一方面是方便看信息，另一方面也是让人家看到搿只“汉显”。

　　刚刚出来个“汉显”价钿相当“高端”，有些人爱虚荣又不想花那么多钱，哪能办呢？伊拉自有办法，据说当时有些人腰里个中文BB机既勿会叫，也勿会振动，更勿会显示中文内容，因为伊拉就是辣地摊浪向买只玩具BB机挂了身浪，倒也可以满足虚荣心。

　　葛末，阿是有了中文显示了，就万事大吉了呢？也勿是。

　　有一趟，我到上海新客站去接一位北京来个著名演员，我个“汉显”上显示：客人乘13次特快于X日抵沪。我一早就赶到新客站南广场出口处等伊。结果13次列车到站后一个多钟头，客人还呒没出来。我正担心客人会不会出啥事体。结果有同事打来传呼，搿位演员已经到宾馆了。原来，伊从新客站北广场出来了。唉，BB机一响，有人满面春光，喜气洋洋；有人满面愁容，黯淡无光。

　　现在手机4G已经普及，马上又要跨进5G时代；不过，老底子用过个BB机，还是勿会忘记。