搿两天买菜辰光，看到有新鲜黄芽菜上市，马上就想到烧一碗烂糊肉丝。从前单位食堂里，让人百吃勿厌个一只菜就是伊了：热曈曈浇了白饭浪向，老下饭嗰。

　　讲起来，烂糊肉丝只是一碗勿上台面个家常菜。不过，要烧得好吃，也勿便当。比方讲，一定要是黄芽菜，勿是大白菜。讲得再准确一眼，是大白菜里个黄芽菜。

　　大白菜矮墩墩，白撩撩，烧熟仔有一股淡水气。黄芽菜就要瘦长一眼，当中横里有点收腰，最外头一层有点绿莹莹，里向一层层包得老紧个叶片应该是嫩黄颜色嗰。搿种菜糯性，烧出来好吃。

　　烧法也是有眼讲究嗰。肉丝顶好带点肥，用生粉料酒浆好，辣八成热个油镬子里划散；黄芽菜要顺丝溜切，搿能烧出来个黄芽菜软糯，勿会烂糊沓沓搛勿起来；冬笋丝要斜切，不要太细，否则断得窸窸窣窣，呒没卖相，呒没嚼头。

　　先放笋丝，煸透，再放黄芽菜丝翻炒，最后放肉丝，转小火焖十几分钟，加盐、加稍许糖吊鲜头，勾芡以后就可以盛出来了。

　　芡要厚薄正正好，厚了，像面粉坨坨，勿烂糊；薄了，清水咣当勿成糊；再考究一眼，出锅前头要补一眼油，顶好是用猪油，香。

　　所以讲，烂糊肉丝，糊嗰只是外表，内在条理还是煞辣斯清嗰。