“掼”辣字典里是“扔，掷，跌，使跌”个意思，现在用到伊个场合已经不多了，勿过，辣上海闲话里，“掼”却引申出勿少有意思个讲法，比如：掼派头、掼浪头、掼纱帽、掼派司、掼家生、掼侬三条横马路……

　　辣辣交关老电影里，经常可以看到一眼欢喜炫耀自己门路广、财力强、势力大个人，其中大多数侪是反派人物。其实老辈人往往讲究钱财勿外露，勿愿意到处炫耀嗰。到了现在，翻翻手机里个“朋友圈”，欢喜辣辣“朋友圈”里晒名表、晒豪车、晒各种名牌穿戴个人也是勿少。搿种到处炫耀个行为，用上海闲话来讲就是“掼派头”。

　　掼派头主要用辣欢喜花钞票摆阔劲个人身浪向。还有一部分人袋袋里钞票呒没几张，欢喜辣嘴巴浪向摆阔。搿就勿是“掼派头”了，只能算是“掼浪头”，带有一眼虚假个成分。掼派头、掼浪头用普通闲话来讲就是“显摆”“炫耀”。

　　从古到今，欢喜炫耀个人并勿少见。《史记》中就记载了齐国宰相晏婴个车夫，每次驾车出门侪邪气高调。因为俗话说“宰相门前七品官”，伊作为宰相个车夫，自我感觉也是身份勿低，可以炫耀一番。到了现在，有交关所谓个“奢侈品”被生产出来个目的，也是为让某些人拿去炫耀。有心理学家认为，炫耀是人性个弱点，一个人欢喜炫耀啥东西，往往就是内心缺少啥东西。做人要低调，老祖宗是搿能教育阿拉个，也是阿拉中华民族个优秀传统。

　　“掼派司”是指通过亮证件显示后台。其中“派司”来源于英文passport个音译。当然，“掼派司”所亮个证件必须“硬档”。“掼家生”是指上海人屋里向吵相骂，一方发了脾气扔这丢那。过去，掼家生是老上海弄堂里个通常节目，十天半月就会上演一两趟。现在是看大勿到、听大勿到了。

　　从“掼派头”引申出去，“派头”有钱，“纱帽”就是有权了。“掼纱帽”被用来比喻由于气愤或有情绪而辞职。“掼纱帽”还有眼脱仔上级讨价还价个味道——假使勿能满足伊，伊就要辞职勿做了。

　　“掼侬三条横马路”曾经是一种流氓切口，当时上海个流氓势力侪辣街道浪占据地盘，通过盘剥地盘上民众获取钱财。流氓势力大地盘就大，势力小地盘就小，地盘之间往往以马路作为分隔。假使一方流氓势力比另一方多出三条“横马路”，说明势力差距老大。后来，搿种讲法辣上海市民之间流传开来，用来形容差距巨大。假使某人某方面个能力远远超过侬，就可以讲“伊辣搿方面本事邪气大，掼侬三条横马路”。