我养垃农村，长垃农村，从三林中学初中毕业，正碰着“文革”，只好回到乡下头“修地球”，种仔大半生世田，做到老也勿发财。嗳，想勿到我回来后稍翘呔，前年仔伲海头规划造经适房，伲征地转性成了居民户，每个月有伦千块养老金，看毛病还可以报销。伲要登到小区里去做“城里人”呔【dha，哉、 】。 

　　农民动迁末是伲农民个大喜事，伲应当支持国家建设。我顶反对做事体牵丝扳藤勿爽气。我是一向欢喜“薄刀开毛竹，一刮两响”个。隔壁邻舍话，动迁组个人侪是讲花好稻好样样好，弄来完来络乱天花；还讲伊拉是啥个骗煞人勿偿命。我想，政府也勿会独欺伲个，来挨门达户做工作个干部末搭我前世无冤今世无仇，骗我迭个宿老头子做啥？我自家一碗水辣拉两个儿子面浪端得平，八九不离十末就可以拉呔。 

　　实话讲，伲个旧房子赔偿个钞票末，拿我个身体贴上去卖脱仔末，也买勿起啥房子。现在两个儿子拉，一家一套新房子拿好，伲老夫妻两个登一室一厅个小套，还有好几万块个装修铜钿，真是辣拉睏梦头里也【hha】想勿着个。旧年头，宅浪向有个好心人搭我讲：老爷叔啊，侬去算算命看，迭生世还发啥财 ，侬现在前勿着村，后勿着店，只勿过乘迭趟动迁个机会脱政府讨价还价，多弄眼铜钿。我讲，命里穷末是个穷，拾着黄金变仔铜，人算勿如天算。老早个辰光，辣拉伲爷娘手里，只不过传拨我半房半灶一间旧房子，伊拉也是爷传儿子子传孙个，哪能伊拉几生几世起勿起啥船咾造勿起啥屋，到仔我一代个手里末，伲哪能介来咾造得起两上两下楼房，外加两个灶披间？人末要讲良心，勿可以汗毛根根曲，人心依勿足个。迭趟动迁，我是老实话斜气满足拉呔。所以末，我吃虾等勿得弯，辣拉签约个辰光，头一个上去签。乃末又有人讲我勿和勿乖，寿头八气。我是娘俩个嫁爷俩个，一门心思拉呔，再讲讲末我也是老党员，也应该要配合政府做好动迁工作。 

　　签约过后一个月，我辣拉浦江世博家园里借仔一套三室一厅个房子，一大家门搬进去过渡，每月过渡费补贴付脱仔还有勿少余头，加浪【上】伲个养老金，真是坐仔拿铜钿，开心来呒饭三日饱。搬家个一天，伲一家门辣拉老房子前头拍仔一张“合家欢”，临到走，我拿搿张“xx村7组28号”个门牌挢【jhiao】下来留作纪念。伲一家门乡下人要做“城里人”仔！