旧年新民晚报报道了一位伤心母亲个投诉：伊个囡儿因为自家跟爸爸姆妈侪呒没买到老师建议个参考书而大发脾气，拿夜饭菜泼垃地浪向，伊姆妈讲伊两句，她居然出走了之。令人唏嘘个是：迭个小囡垃拉学堂里还是三好学生，事体又发生垃本应向母亲致敬、而勿是让伊伤心个三八妇女节。所以，我个第一个反应是伊拉爷娘对迭个小囡忒宠了，而且欠教养，如果换成垃拉饥寒交迫中长大个小囡，随便哪能勿会得暴殄天物，泼倒饭菜来撒气！

　　我日前碰到过一眼小囡，有个勿思一粥一饭来之勿易；有个对家长大吵大闹做出无理行为个；也有对同学勿能平等、尊重、友好相处个，也有大手大脚每月手机费开销好几百个，有眼小囡拿手机、自行车、MP3等更新换代赛过家常便饭。有一个家长花上千元搭囡儿买了一双“耐克”鞋，夜到就迫不及待个问伊：“今朝侬穿耐克，同学哪能讲？”囡儿冷冷个回答：“耐克有啥啦？啥人来注意侬。”为啥垃物质条件越来越好个今朝，常常产生一些家长始料勿及个问题？哪能预防搭制止迭点问题呢？我觉得传统个朱子家训个核心：“”，值得家长们仿效。“富门寒教”个真谛，是有意让下一代垃拉现实生活中经受眼挫折，让小囡懂得勿吃一堑，焉长一智。英国著名个伊顿中学，学生毕业后100%考进名牌大学，培养出交关人才，经验之一就是让学生吃苦。英国天气老冷，迭所中学勿设暖气，让学生只盖一条毛毯睏觉，汏浴也要用冷水，刻意“劳其筋骨、苦其心志”来磨练学生。自古“成自勤俭败由奢”。湖北省黄冈中学，学生进校第一堂课，就让学生观看学堂专门制作个录像《二十一张图片背后的故事》。其中有一个故事讲述一个穿得老破烂个17岁少年，背拉100多斤煤走1公里路，为个就是赚取1块洋钿生活费。再比如讲：我认得一个品学兼优个学生，现在进了哈佛大学就读，伊可以讲出身“富门”，爸爸开高级跑车，但伊从小学到初中，伊爸爸总归用普通个摩托车接送伊读书，还弄得失窃了两部摩托车，伊个爸爸就是刻意要小囡学会平等，学会尊重、避免自傲。而伊姆妈垃拉节假日总归有意识个带小囡到小菜场，体验讨价还价、货比三家勤俭持家个意识，还喜欢跟卖菜小商贩聊家常，垃拉潜移默化中让小囡懂得“珍惜”搭“感恩”。

　　总之，做爷娘个如果对小囡“事事迁就、处处包办、饭来张口、茶来伸手“个教育，小囡就勿会懂得劳动个喜悦、勿晓得生活个艰辛，是培养勿出知难而上、百折不挠个人格个，是造就勿出表里如一、荣辱分明个人品个。